(ජයන්ත සමරකෝන්)
 
එංගලන්තයේ සිට මෙරටට ආනයනය කර ඇති කසළ අඩංගු කන්ටේනර් 130ක් වසර එකහමාරක් තිස්සේ ප්‍රතිඅපනයනය නොකිරීම සම්බන්ධයෙන් හේලිස් පෞද්ගලික සමාගමට එරෙහිව නීතිය තදින් ක්‍රියාත්මක කිරීමටත්, වහාම එම කසළ තොග ප්‍රතිඅපනයනය කිරීමටත් උපදෙස් දුන් බව, ආර්ථික කටයුතු පිළිබඳ ආංශික අධ්‍යක්ෂණ කාරක සභාවේ සභාපති පාර්ලිමේන්තු මන්ත්‍රී හර්ෂණ රාජකරුණා මහතා අද(25) අරලියගහ මන්දිරයේ  පවැති ප්‍රවෘත්ති සාකච්ඡාවකදී පැවසීය.
 
ඒ සමඟම දැනට වරායේ රඳවා ඇති කසළ කන්ටේනර් 111ක්ද, ඉදිරි සති දෙක ඇතුළත වහාම ප්‍රතිඅපනයනය කරන ලෙසට ඒවා ගෙන්වූ තවත් සමාගමකට තදින් අවවාද කළ බවද මන්ත්‍රීවරයා කීය.
 
කෙසේ වෙතත් මෙරටට කසළ ආනයනය කිරීම නීතිවිරෝධී ක්‍රියාවක් බවද, මෙම කසළ අපද්‍රව්‍ය ගෙන්වීමට 2013 වසරේදී පසුගිය රජය නිකුත් කළ ගැසට් පත්‍රය හෝ ශ්‍රී ලංකා සිංගප්පූරු වෙළඳ ගිවිසුම යොදා ගෙන ඇති බවට ගෙනයන ප්‍රචාරය මුළුමණින්ම අසත්‍යයක් බවද ඔහු කීවේය.