(ඩයනා උදයංගනී)

කොවිඩ් 19 වයිරසයෙන් ආරක්ෂාවීම සඳහා මේ වනවිට භාවිතය කර ඇති එන්නත ශ්‍රී ලංකාවට ලබාගැනීමට සෞඛ්‍ය අමාත්‍යංශය ලෝක සෞඛ්‍ය සංවිධානයෙන් ඉල්ලීම් කර ඇතැයි සම කැබිනට් ප්‍රකාශක, වැවිලි අමාත්‍ය වෛද්‍ය රමේෂ් පතිරණ මහතා අද (8) පැවසීය.

මෙම එන්නත ලොව සෑම රටකටම සමානව බෙදා දීමේ වැඩපිළිවෙලක් ලෝක සෞඛ්‍ය සංවිධානය සකස්කර ඇති බවත් ඒ අනුව ශ්‍රී ලංකාවට ලැබිය යුතු කොටස ලබාගැනීමට මෙසේ ඉල්ලීම් කර ඇති බවත් ඇමතිවරයා සඳහන් කළේය.

 මේ වනවිට සාර්ථක බවක් පෙන්නුම් කොට ඇති එම එන්නත නිෂ්පාදන ධාරිතාවය අනුව ලංකාවට ද ලබා දීමට ලෝක සෞඛ්‍ය සංවිධානය ඉදිරියේදී කටයුතු කරනු ඇතැයිද  රමේෂ් පතිරණ මහතා කීවේය.

ඒ අනුව, ඉදිරි මාස තුනත් හ‍යත් අතර කාලයේදී ශ්‍රී ලංකාවට මෙන්ම ලොව අනෙකුත් රටවලට ද මෙම වයිරසයෙන් මිදීමට හැකි වනු අපේක්ෂා කරන බව ද හෙතෙම පැවසීය.

අමාත්‍යවරයා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද (8) පැවති කැබිනට් තීරණ දැනුම්දීමේ මාධ්‍ය හමුවේදී මාධ්‍යවේදියෙකු  නැඟූ ප්‍රශ්නයකට පිළිතුරු දෙමිනි.

එමෙන්ම, දේශීයව නිෂ්පාදිත ඖෂධ වෛරසයට එරෙහිව හොඳින් ප්‍රතිචාර දක්වන්නේ නම් වෛරසය මැඩලීමේ කෙටි කාලින ක්‍රියාමාර්ගයක් ලෙස ජනතාවට ලබා දීමට බටහිර වෛද්‍යවරුන්ගේ එකඟතාවය ද ලැබී ඇති බව ද ඒ මහතා මෙහි දී සඳහන් කළේය.

එහි සාර්ථකභාවය පරීක්ෂා කර බලා ඉදිරි ක්‍රියාමාර්ග ගන්නා බවද ඇමතිවරයා කීවේය.