(අංජුල මහික වීරරත්න)

ජාතික කලා භවන වැඩි දියුණු කර සංරක්ෂණය කිරීමේ ව්‍යාපෘතිය කඩිනම් කිරීමට කැබිනට් අනුමැතිය ලැබී ඇත.

ජාතික කලා භවන වැඩි දියුණු කර සංරක්ෂණය කිරීමේ ව්‍යාපෘතියේ කටයුතු ශ්‍රී ලංකා නාවික හමුදාව විසින් සිදු කරනු ලබන අතර ව්‍යාපෘතියේ සියලු කටයුතු 2024 වර්ෂය තුළදීම අවසන් කිරීම පිණිස 2024-02-19 දින පැවති අමාන්‍ය මණ්ඩල රැස්වීමෙදී අනුමැතිය ලබා දී ඇත. 

එහෙත්, එම කටයුතු පසුගිය වර්ෂයේ දී සම්පූර්ණයෙන්ම අවසන් කිරීමට නොහැකි වී ඇති අතර 2025 වර්ෂයේ අයවැය ඇස්තමේන්තු යටතේ ඒ සඳහා රුපියල් මිලියන 120 ක මූල්‍ය ප්‍රතිපාදන වෙන් කර ඇත. 

එහෙත්, ව්‍යාපෘතියේ වැඩ සම්පුර්ණයෙන්ම අවසන් කිරීම සඳහා එම ප්‍රතිපාදන ප්‍රමාණවත් නොවන බවත්, තවදුරටත් රුපියල් මිලියන 32 ක අමතර මුල්‍ය ප්‍රතිපාදන අවශ්‍ය බවත් මේ වන විට හඳුනාගනු ලැබ තිබේ. 

ඒ අනුව, ජාතික කලාභවන නවීකරණ කටයුතු කඩිනමින් අවසන් කිරීම සඳහා අමතර අයවැය ප්‍රතිපාදන සලසා ගැනීම සම්බන්ධයෙන් බුද්ධශාසන, ආගමික සහ සංස්කෘතික කටයුතු අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.