(යොහාන් භාසුර)

දුම්රිය ස්ථානාධිපතිවරු පත්කිරීම සඳහා රුපියල් කෝටි දෙකකට ආසන්න මුදලක් වැය කර 2019 වසරේ පැවැත්වූ තරග විභාගයේ ප්‍රතිඵල මත දුම්රිය ස්ථානාධිපතිවරු 29 ක් පමණක් බඳවාගෙන ඇති බව ශ්‍රී ලංකා දුම්රිය ස්ථානාධිපති සංගමයේ ප්‍රධාන ලේකම් කසුන් චාමර මහතා පවසයි.

දුම්රිය ස්ථානාධිපති පුරප්පාඩු පිරවීම සඳහා 2019 වසරේ ගැසට් කර 2021 වර්ෂයේ අදාල විභාගය අයදුම්කරුවන් 29,399 කගේ සහභාගිත්වයෙන්  දීපව්‍යාප්තව පවත්වා ප්‍රතිඵල නිකුත් කර ඇති බවත් කළමණාකාර සේවා දෙපාර්තමේන්තුව රජ්‍ය ප්‍රතිපත්ති සමඟ නව බඳවාගැනීම් කිරීමට අනුමැතිය නොදීම මත විශාල මුදලක් වියදම් කර පැවත්වූ විභාගය පදනම් කර ගනිමින් මේ වන විට දුම්රිය ස්ථානාධිපති තනතුර සඳහා බඳවාගැනීමට හැකියාව ලැබී ඇත්තේ අයඳුම්කරුවන් 29 ක් පමණක් බවත් චාමර මහතා සඳහන් කළේය.

මෙම ගැටලු සම්බන්ධයෙන් පාලනාධිකාරිය දැනුවත් කළ ද ප්‍රගතියක් නොමැති බව කී කසුන් චාමර මහතා සඳහන් කළේ පවතින පුරප්පාඩු සඳහා මෙම විභාගයට පෙනී සිටි සුදුසුකම් සපුරා ඇති අයඳුම්කරුවන් බඳවාගැනීමට අවශ්‍ය කටයුතු කරන ලෙස ප්‍රවාහන අමාත්‍යවරයාගේ අවධානය යොමු කරන බවත්ය.