(නිමල කොඩිතුවක්කු)      
  
එක්සත් ජාතික පක්ෂයේ දක්ෂ තරුණ දේශපාලඥයින්ගේ කීර්තිනාමයට හානි කරන දේශපාලන හස්තයක් ක‍්‍රියාත්මක බව  එක්සත් ජාතික පක්ෂයේ මාධ්‍ය ප‍්‍රකාශක විදුලි සංදේශ  ඩිජිටල් යටිතල පහසුකම් සහ විදේශ රැකියා අමාත්‍ය හරීන් ප‍්‍රනාන්දු මහතා අද (19)  පැවසීය.

පක්ෂයක් ලෙස ඉදිරියේ දී මේ සම්බන්ධයෙන් දැඩි පියවර ගැනීමට කටයුතු කරන බවත් අමාත්‍යවරයා සඳහන් කළේය.

පිටකෝට්ටේ පිහිටි සිරිකොත එක්සත් ජාතික පක්ෂ මූලස්ථානයේදි අද (19) පැවති මාධ්‍ය හමුවකට එක්වෙමින් ඒ මහතා මේ බව පැවසීය.

එහිදී වැඩිදුරටත් අදහස් දැක්වූ අමාත්‍ය හරීන් ප‍්‍රනාන්දු මහතා මෙසේද කීවේය.

 ‘‘ෆේස්බුක් ඇතුලූ සමාජ මාධ්‍යවල මේ දිනවල ප‍්‍රධාන ප‍්‍රවෘත්තිය බවට පත්ව තිබෙන්නේ සුජිව සේනසිංහ මහතා  සම්බන්ධ ප‍්‍රවෘත්තියයි. අපෙනුත් මේ ගැන  යම් යම් අය අහනවා. මම දන්න සුජීව සේනසිංහනම් මේ වගේ මෝඩයෙක් නෙමෙයි කියලා මම නම් ඒ අයට කිව්වා.

මේ වගේ ලොකු ආයෝජනයක් ගේනවිට  ඒ ආයෝජකයන් තානාපති කාර්යාලය සම්බන්ධ කරගන්නවා.  ඒ නිසා මේ චෝදනා නගපු සමාගම ගැන හොයන්න කියලා අපි ඉතාලි තානාපති කාර්යාලයට ලියනවා.
මේ චෝදනාව නගන සමාගම යූරෝ බිලියන 05ක ආයෝජනයක් ගේනවලූ. එහෙම ආයෝජනයක් ගේන සමාගමේ කාර්යාලයට වඩා  මගේ බදුල්ලේ මැතිවරණ කාර්යාලය ලොකුයි. මේක පට්ටපල් බොරුවක් කියලා  ඕනම අයෙකුට තේරෙනවා.

මේක එතුමන්ට එරෙහිව හිතා මතා ගහන මඩ ප‍්‍රචාරයක් කියලා පැහැදිලි වෙනවා. මේක  කතා කරන්න තරම්වත් දෙයක් නෙමෙයි. නමුත්  සේනසිංහ  මහතා  කිව්වා වගේ මේක මානසික වදයක්. තමනගේ දෙමව්පියන්ට,  තමන්ගේ නමට මේකෙන් විශාල කැළලක් වනවා.

ඡායාරූප - ගයාන් අමරසේකර