ගෝලීය වසංගතයක් බවට පත්ව තිබෙන නව කොරෝනා වයිරසයෙන් දුප්පත් ජනතාවට සහන සැලැසීම සඳහා ඇමෙරිකානු ඩොලර් බිලියන 22 සහන පැකේජයක් ක්‍රියාත්මක කරන බව ඉන්දීය රජය ප්‍රකාශ කරයි.
 
‘‘කවුරුවත් බඩගින්නේ මැරෙන්න ඕනෑ නැහැ. කවුරුවත් අතේ සල්ලි නැතුව ඉන්න ඕනෑ නෑ’’ යැයි ඉන්දියාවේ මුදල් අමාත්‍ය නිර්මලා සීතාරම් ප්‍රකාශ කළාය.
 
මෙම සහන පැකේජය යටතේ නොමිලේ ආහාර ගැනීමට මුදල් හුවමාරු සහ ගනුදෙනු සඳහා පහසුකම් සැපයේ. ‘‘මෙයින් සහන සැලසෙන්නේ කඩිනමින් උදවු උපකාර අත්‍යවශ්‍ය අයට පමණක්’’ යැයි ද ඇය කීවාය.
 
සෞඛ්‍ය සේවකයන්ට ඇමෙරිකානු ඩොලර් 66,500ක වෛද්‍ය රක්ෂණාවරණයක් පිරිනමන බව ද ඉන්දීය මුදල් අමාත්‍යවාරිය පැවැසුවාය.
 
මෙම මුදල ඉන්දීය දළ දේශීය නිෂ්පාදිතයෙන් සියයට 1ක් යැයි ද මීට සමාන සහන පැකේජ නිවේදනය කළ ඇමෙරිකාව සහ සිංගප්පූරුව එම සහන පැකේජ සඳහා ඔවුන්ගේ දළ දේශීය නිෂ්පාදිතයෙන් සියයට 10කට ආසන්න ප්‍රමාණයක් වෙන් කර ඇතැයි ද වාර්තාකරුවෝ පෙන්වාදෙති.
 
කෙසේ නමුත් මෙය පළමු පියවර වනු ඇතැයි ද ඉන්දීය රජය ඉදිරියේදී තවත් ක්‍රියාමාර්ග ගනු ඇතැයි ද ඔවුහු වාර්තා කළහ.
 
බී.බී.සී. ඇසුරිනි
 
 055