ඇමෙරිකාවේ ඩේටන් නගරයේ, ඔහියෝ ප්‍රාන්තයේ, ඔරිගන් දිස්ත්‍රික්කයේ පුද්ගලයකු කළ වෙඩිතැබීමකින් පුද්ගලයන් දසදෙනෙකු මිය ගොස් 16දෙනෙකු තුවාල ලබා ඇතැයි පොලිසිය කියයි.

මෙම ඝාතන සිදුකළ පුද්ගලයා ද පොලිසිය කළ වෙඩිතැබීමෙන් මිය ගොස් ඇති අතර, ඒ අනුව වෙඩි තැබූ පුද්ගලයා ඇතුළු පුද්ගලයන් නමදෙනෙකු මිය ගොස් තිබේ.

ඔරිගන්හි  නෙඩ් පෙපර්ස් නම් මත්පැන් අවන්හල අසළදී අද උදෑසන 1.00ට පමණ මෙම වෙඩිතැබීම සිදුව ඇත.

වෙඩික්කරු රයිෆල් වර්ගයේ ගිනි අවියකින් වෙඩිතබා ඇතැයිද, ඔහු කේවලව ක්‍රියාත්මක වී ඇති බවද ඩේටන් පොලිස් දෙපාර්තමේන්තුවේ උප පොලිස් ප්‍රධානී මැට් කාපර් මහතා පවසයි.

ප්‍රදේශයේ මුර සංචාරයේ යෙදුණු පොලිස් නිලධාරීන් වෙඩිතැබීම සිදුවූ  ප්‍රදේශයට ක්ෂණිකව ගොස් එහි සෝදිසි මෙහෙයුම් ක්‍රියාත්මක කර තිබිණි. සිද්ධිය සැලවූ වහාම පොලිස් නිලධාරීන් එම ස්ථානයට ගොස් ක්‍ෂණිකව ක්‍රියාකිරීම හේතුවෙන් මෙම සිද්ධිය මැඩපැවැත්විය හැකි වූ බව ඩේටන් පොලිසිය පවසයි.

තුවාලකරුවන් ඒ අසළ වූ රෝහල් කරා ගෙනයාමට එම නිලධාරීන් කටයුතු කර ඇත.

මේ සම්බන්ධයෙන් පර්යේෂණ පවත්වන ආරක්ෂක අංශ පැවසුවේ මෙම ප්‍රහාරයේ අරමුණ පැහැදිලි නොවුණ බවය. 
ඔවුන් මෙතෙක් මිය ගිය වෙඩික්කරුගේ අනන්‍යතාව මාධ්‍යයට හෙළිකර නැත.
 
ඇමෙරිකාවේ රහස් ඔත්තු සේවා සිද්ධිය සම්බන්ධයෙන් පරීක්ෂණ පවත්වමින් සිටී.
 
ඇමෙරිකාවේ ටෙක්සාස්හි පුද්ගලයන් 20දෙනෙකුට මරු කැදවමින් කළ වෙඩිතැබීමකින් පැය කිහිපයකට පසු ඔහියෝ ප්‍රාන්තයේ මෙම වෙඩිතැබීම වාර්තා වී තිබිණි.

(බීබීසී සහ රොයිටර් ඇසුරිනි)

16844