(  සිතුම් චතුරංග)

මන්නාරම , මුරුණ්කන් අච්චන්කුලම් ප්‍රදේශයේදී තියුණු ආයුධ වලින් පහරදී එක් දරු පියකු ඝාතනය කිරීමේ සිද්ධිය සම්බන්ධයෙන් එකම පවුලේ පුද්ගලයින් සිව්දෙනකු අද (18) අත්අඩංගුවටගත් බව මුරුණ්කන් පොලිසිය කියයි.

අත්අඩංගුවටගත් සැකකරුවන් අතර එකම පවුලේ පියා , පුත්‍රයා , මාමා සහ බෑණා සිටින බව පොලිසිය සඳහන් කළේය.

එලෙස තියුණු ආයුධවලින් පහරදී ඝාතනය කොට ඇත්තේ මන්නාරම , මුරුණ්කන් අච්චන්කුලම් හි පදිංචි රත්නසිංහම් තුෂියන්දන් නැමති 25 හැවිරිදි එක්දරු පියකු වේ.

මියගිය පුද්ගලයාගේ සහෝදරයකු විසින් සැකකරුවන්ගේ පවුලේ දියණියක් වන තරුණියක සමඟ ප්‍රේම සබධතාවක් පවත්වාගෙන ගොස් ඇති අතර එම සබඳතාවට විරුද්ධවී තරුණියගේ පියා සහ සහෝදරයා ප්‍රේම සබඳතාව පැවැත්වූ තරුණයාට පහරදීම ඝාතනයට හේතුවී ඇති බව පොලිසිය පැවසීය.

එම පහරදීම සම්බන්ධයෙන් විමසීමට පෙරේදා(17) දහවල් පහරකෑ තරුණයාගේ වැඩිමල් සහෝදරයා තරුණිය සිටි නිවසට ගොස් ඇති අතර එහිදී තරුණියගේ පියා , සහෝදරයා , මාමා සහ මස්සිනා කෙනකු තියුණු ආයුධවලින් පහරදී ඇති බව පොලිසිය පැවසීය.

පහරදීමෙන් මියගිය පුද්ගලයාගේ හිස බරපතල ලෙස තුවාල සිදුවී ඇති අතර ප්‍රදේශවාසීන් විසින් ඔහු මන්නාරම නානට්ටාන් ප්‍රාදේශිය රෝහල වෙත ඇතුලත් කිරීමේදී මියගොස් ඇති බවත් පැවසීය.