(උපුල් හේරත්)

අනුරාධපුර ශික්ෂණ රෝහලට ඇතුළත් කරන ලද හදවත් රෝගීන්ගේ ප්‍රමාණය හා මිය යන ලද සංඛ්‍යාව පෙර වර්ෂවලට වඩා මේ වසර තුළ ඉහළ අගයක් ගෙන ඇතැයි රෝහල් ලේඛන උපුටා දක්වයි.

2021 හා 2022 යන වර්ෂවල හදවත් රෝගීන් පමණක් එක් වසරකට නේවාසිකව ප්‍රතිකාර ලැබූ ප්‍රමාණය හාර දහසක්, පන්දහසක් අතර අගයක් ගෙන තිබූ බව රෝහල් අධ්‍යක්ෂවරයා කියයි.

මෙම වසරේ ජනවාරි පළවැනි දින සිට අගෝස්තු දහ වැනි දින දක්වා කාලය තුළ රෝගීහු 4376ක් වාර්තා වෙති. ඉන් රෝගීහු 343 දෙනෙක් මියගොස් සිටිති. ඉකුත් වසරේ රෝහල්ගත වූ ප්‍රමාණයට සාපේක්ෂව මෙය  ඉහළ අගයක් බව රෝහල සඳහන් කරයි.

අනුරාධපුර ශික්ෂණ රෝහලෙන් පමණක් මෙම පිරිස වාර්තා වී ඇති අතර ප්‍රාදේශීය රෝහල්වලට හෘද රෝගීන් ඇතුළත් වන්නට ඇතැයි වෛද්‍යවරු අනුමාන කරති. පවතින දැඩි උණුසුම හා එම හේතුවෙන් සිදුවන විජලනය, ආහාර රටාවේ දුර්වලතා ව්‍යායාම නොමැතිකම හා විශේෂයෙන් මානසික ආතතිය මෙවැනි රෝග වැඩි වීමට හේතු වනු ඇතැයි රෝහල් අධ්‍යක්ෂක වෛද්‍ය දුලාන් සමරවීර මහතා පැවසීය.

දැඩි උණුසුමක්, පවතින ආර්ථික අවපාතයත් දුර්වල ආහාර රටාවත් සැලකිල්ලට ගෙන විශේෂයෙන් හදවත් රෝගීන් ආරක්ෂා විය යුතු බවත් ළඟම ඇති රෝහලේ වෛද්‍ය වරයෙකුගෙන් නිසි උපදෙස් ලබා ගත යුතු බවත් අධ්‍යක්ෂවරයා වැඩිදුරටත් කීය.