අභාවප්‍රාප්ත දෙවැනි එළිසබෙත් රැජිනගේ අවමංගල්‍ය උත්සවය දින 11 ක ශෝක කාලය අවසන් කරමින් ඉතා ගාම්භීර අන්දමින් ආරම්භ විය.

වෙස්ට්මිනිස්ටර් ශාලාවේ තැන්පත් කර තිබුණු මහ රැජිනගේ දේහය, රාජකීය නාවික හමුදා සෙබළුන් විසින් හමුදා ගෞරව මැද, වෙස්ට්මිනිස්ටර් දෙව් මැදුරට රැගෙන යනු ලැබුණේ චාල්ස් රජුගේ සහ රජ පවුලේ සාමාජිකයන්ගේ ප්‍රධානත්වයෙනි.

කැමිලා බිසව, විලියම් කුමරු, හැරී කුමරු, කේට් කුමරිය, කුඩා ජෝර්ජ් කුමරු සහ චාලට් කුමරිය ද ඒ අතර වූහ.

වෙස්ට්මිනිස්ටර් දෙව්මැදුරේ දී විශේෂ දේව මෙහෙයක් රැජින වෙනුවෙන් පැවැත්විණි. ඒ සියලු දෙනා විනාඩි දෙකක කාලයක් රැජිනට ගෞරව දක්වමින් නිහඬව සිටීමෙන් ද අනතුරුවය.

මහ රැජිනට අවසන් ගෞරව දැක්වීමට ලන්ඩනයට පැමිණ සිටි සියලු රාජ්‍ය නායකයන් සහ නියෝජිතයන් ද වෙස්ට්මිනිස්ටර් දෙව් මැදුරේ පැවැති දේව මෙහෙයට එක් වූහ.

දේව මොහෙය පැවැත්වූයේ වෙස්ට්මිනිස්ටර් ප්‍රධානී ඩේවිඩ් හොයිල් පියතුමන් අතිනි. එහිදී පියතුමන්, මහ රැජින ගැන ගුණ කථනයක් කළ කළ අතර බි්‍රතාන්‍ය නව අග්‍රාමාත්‍යවරිය වන ලිස් ට්‍රස්ගේ ඇතුළු බ්‍රිතාන්‍ය රජයේ ශෝක පණිවුඩය ද රැස්ව සිටි පිරිස හමුවේ පැවැසුවේය.

ජාතික ගීය ගායනා කිරීමෙන් පසු දේහය රැගත් රිය පෙරහර වෙස්ට්මිනිස්ටර් දෙව්මැදුරෙන් පිටත් විය.

(රොයිටර්/බීබීසී)