(සුජිත් හේවාජුලිගේ සහ  අංජුල මහික වීරරත්න)

ආන්දෝලනයට තුඩුදුන්  අධිභාර පනත් කෙටුම්පත ආණ්ඩුක්‍රම ව්‍යවස්ථාවට අනුකූල බවට ශ්‍රේෂ්ඨාධිකරණය දැනුම්දී ඇතැයි නියෝජ්‍ය  කතානායක රංජිත් සියඹලාපිටිය මහතා පාර්ලිමේන්තුවේදී  අද පැවසීය.

ඒ අනුව එම පනත් කෙටුම්පත සරල බහුතරයකින් සම්මත කළ හැකි බව ද ශ්‍රේෂ්ඨාධිකරණය දන්වා ඇති බව නියෝජ්‍ය කතානායකවරයා කීවේය.

නියෝජ්‍ය කතානායකවරයා ශ්‍රේෂ්ඨාධිකරණයේ මේ තීරණය දැනුම් දුන්නේ සභාවේ කටයුතු ආරම්භයේදීය.

රුපියල් කෝටි දෙසීයකට වැඩි ආදායම් උපයන සමාගම් හෝ පුද්ගලයන්ට  සියයට 25 ක  අධිභාරයක් පැනවීම සඳහා විධිවිධාන සැලසීම අධිභාර පනත් කෙටුම්පතේ අරමුණයි.

මේ අනුව මේ පනත් කෙටුම්පත පාර්ලිමේන්තුවේදී ඉදිරි දිනෙක සම්මත කිරීමට නියමිතව ඇතැයි පාර්ලිමේන්තු ආරංචි මාර්ග වලින් පැවසේ.