(විමුක්ති එස් රුද්‍රිගු)

ශ්‍රී ලංකාව සහ එක්සත් රාජධානිය අතර වෙළඳ සබඳතා තරකර ගැනීමේ අදහසින් එක්සත් රාජධානියේ ඉන්දු - ශාන්තිකර කලාපය සඳහා වූ අමාත්‍යවරිය වන කැතරින් වෙස්ට් අද (27) සහ හෙට (28) ශ්‍රී ලංකාවේ දෙදින නිල සංචාරයක නිරත වූවාය.

මෙරට සාර්ව ආර්ථික සංවර්ධනය, දූෂණ විරෝධය, මානව හිමිකම් සහ ජාතික ප්‍රතිසන්ධානයද ඇතුළත් කරුණු ගණනාවක් සම්බන්ධයෙන් එක්සත් රාජධානිය සහ ශ්‍රී ලංකාව අතර සහයෝගීතාව ශක්තිමත් කර ගැනීම කැතරින් වෙස්ට් මහත්මියගේ දෙදින ශ්‍රී ලංකා නිල සංචාරයේ අරමුණ වූවාය. එක්සත් රාජධානිය සහ ශ්‍රී ලංකාව අතර වෙළඳාම් කටයුතු සඳහා රුකුල් දෙන ආකාරයේ නව අපනයන වැඩ පිළිවෙළක් සම්බන්ධයෙන් පියවර ගැනීමටද අමාත්‍යවරිය සිය නිල සංචාරයේදී සැලසුම් කළාය.

අමාත්‍ය කැතරින් වෙස්ට් මහත්මිය අද (27) අග්‍රාමාත්‍ය හරිනි අමරසූරිය සහ විදේශ කටයුතු අමාත්‍ය විජිත හේරත් යන මහත්ම මහත්මීන් මුණ ගැසී සාකච්ඡා කළ අතර හෙට (28) දිනයේ මානව අයිතිවාසිකම්, ප්‍රතිසන්ධානය, දේශගුණික විපර්යාසයන්ට සාර්ථකව මුහුණදීම සහ සුළුතර ප්‍රජාවන්ගේ අයිතිවාසිකම් සඳහා එක්සත් රාජධානිය ලබාදෙන අඛණ්ඩ සහයෝගය පිළිබඳව අවධාරණය කිරීම පිණිස යාපනයේ සංචාරයක නිරත වීමටද නියමිතය.

ඉන්දු - ශාන්තිකර කලාපය සඳහා වූ අමාත්‍යවරිය ලෙස කැතරින් වෙස්ට් මහත්මිය පත්වීමෙන් පසුව සිදුකරන ප්‍රථම නිල සංචාරයේ කොටසක් ලෙස එය ශ්‍රී ලංකාවේ දෙදින නිල සංචාරයක නිරත විය.