මේ වනවිට බැංකු ක්ෂේත්‍රයේ පවතින නවතම ප්‍රවණතා සහ ගනුදෙනුකරුවන්ගේ අපේක්ෂා නිවැරදිව හඳුනා ගනිමින්, ස්ථාවර තැන්පතු සඳහා ඉහළම ප්‍රතිලාභ පිරිනැමීමට DFCC බැංකුව පියවර ගෙන ඇතැයි එම බැංකුව සඳහන් කරයි.

ඒ අනුව, DFCC බැංකුවේ වසර 5 ක ස්ථාවර තැන්පතු සඳහා, කල්පිරීමේදී පොලිය ගෙවීමේ පදනම මත, සියයට 30ක වාර්ෂික පොලී අනුපාතයක් හිමි වේ. මෙමගින් ස්ථාවර තැන්පතුවල මුදල් තැන්පත් කරන්නන්ට, වසර 5 ක් තුළ තම ආයෝජනය 2.5 ගුණයකින් වර්ධනය කරගැනීමට අවස්ථාව ලැබෙන අතර, මාස්පතා පොලිය ලබාගන්නා ගනුදෙනුකරුවන්ට පවා සියයට 20 ක වාර්ෂික පොලී අනුපාතයක් පිරිනැමීමට DFCC බැංකුව කටයුතු යොදා තිබේ. මීට අමතරව DFCC බැංකුව තවත් කෙටිකාලීන, එහෙත් ඉහළ ප්‍රතිලාභ ලබාදෙන ස්ථාවර තැන්පතු එකතුවක්ද හඳුන්වා දී ඇති අතර, ඒ යටතේ දින 100, 200 සහ 300 ස්ථාවර තැන්පතු සඳහා පිළිවෙළින් සියයට 22, සියයට22.5 සහ සියයට23ක වාර්ෂික පොලී අනුපාත හිමි වේ.

“පවතින ආර්ථික තත්ත්වය හමුවේ, වඩාත් සුරක්ෂිත අනාගතයක් උදාකර ගැනීම සඳහා, ගනුදෙනුකරුවන් තම ඉතුරුම් දීර්ඝකාලීනව හෝ කෙටිකාලීනව තැන්පත් කිරීමට හොඳම විසඳුම් සොයමින් සිටින බව අප දන්නවා. මේ ආකාරයට ඔවුන් වෙනුවෙන් සමකළ නොහැකි පොලී අනුපාත සහිත ස්ථාවර තැන්පතු හඳුන්වා දීමට අප කටයුතු කළේ ඒ නිසයි. අපගේ වසර 5 ක ස්ථාවර තැන්පතුව මගින් ගනුදෙනුකරුවන්ට කෙටි කාලයක් තුළ තම ඉතුරුම් 2.5 ගුණයකින් වර්ධනය කරගැනීමට අවස්ථාව ලැබෙනවා. ඒ අනුව ඔබ අද දිනයේ රු. මිලියනයක් තැන්පත් කළහොත්, වසර 5 කදී ඔබට රු. මිලියන 2.5 ක මුදලක් ලබාගැනීමට පුළුවන්. කෙසේ නමුත්, මේ ඉහළ පොලී අනුපාත සදාකල් පැවතීමට ඉඩක් නොමැති නිසා, හැකි ඉක්මනින් ස්ථාවර තැන්පතුවක් ආරම්භ කිරීම වඩාත් සුදුසුයි. උද්ධමනය සම්බන්ධයෙන් ශ්‍රී ලංකා මහ බැංකුවේ පුරෝකථනය අනුව, මේ ඉහළ අනුපාත ඉදිරියේදී වෙනස් වීමට ඉඩ තිබෙනවා. 

එහෙත් DFCC බැංකුවේ වසර 5 ක ස්ථාවර තැන්පතුවක් ආරම්භ කළහොත් ඔබට නොවෙනස්ව ඉදිරි වසර 5 සඳහා සියයට30 ක වාර්ෂික පොලී අනුපාතයක් හිමි වේවි.” DFCC බැංකුවේ ජ්‍යෙෂ්ඨ උප සභාපති (පාරිභෝගික බැංකුකරණ සහ කුඩා හා මධ්‍ය පරිමාණ ව්‍යාපාර) ආසිරි ඉද්දමල්ගොඩ මහතා පැවසීය.

595