(විනීතා එම් ගමගේ)

ජාතික අක්ෂි රෝහල පුරා ඇඳ මකුණන් බෝවී තිබීමෙන් නේවාසික රෝගීහු බරපතල අපහසුතාවන්ට පත්වන බව එහි එහි කළ සංචාරයක දී දැකිය හැකි විය. 

රෝහලේ ඇඳන්වල පමණක් නොව ජනෙල් රෙදිවල ද මකුණන් විශාල වශයෙන් බෝවී තිබෙනු දැකිය හැකි වූ අතර රාත‍්‍රී කාලවල දී මකුණන් බිත්ති පුරා දිවයන අන්දම ද දැකිය හැකි විය. ඇඳන්වල ඇති මෙට්ටවල කවර තුළ මකුණන් පොකුරු වශයෙන් රැඳී සිටින බව ද පෙනී ගිය අතර බොහෝ නේවාසික රෝගීන් මකුණන් දෂ්ඨ කිරීමෙන් නින්ද නොමැතිව සිටින බව පැවැසූහ.

මේ තත්ත්වය යටතේ බොහෝ රෝගීන් ඇඳන්වල නොනිදා බිම නිදාගන්නා බව නිරික්ෂණය කළ හැකි විය. එමෙන්ම ඒ තත්ත්වයට පුරුදු වී ඇති මකුණන් බිම නිදා සිටින රෝගීන්ට ද දශ්ඨ කරන බව නේවාසික රෝගීහු කියති.

විශේෂයෙන් මේ තත්ත්වය 4 හා 14 වාට්ටුවල පවතින බව නිරික්ෂණය කළ හැකි විය. අනෙක් වාට්ටු ද මෙම තත්ත්වයේම පවතින්නේ යැයි රෝගීහු කියා සිටියහ.

ඉකුත් දෙසැම්බර් 21 වැනිදා මෙම වාට්ටු වසා මකුණන් නැසීම සඳහා කටයුතු කළ බව මේ පිළිබඳ විමසීමේ දී රෝහල් ප‍්‍රකාශකයෙක් කියා සිටියේය. කෙසේ වෙතත් යළි මකුණු උවදුර පැතිර ඇතැයි පැවසූ එම ප‍්‍රකාශකයා යළිත් එවැනි මකුණු නාශකයක් යෙදිය යුතුව ඇතැයි ද පැවැසීය.

එමෙන්ම රෝහලේ නේවාසික රෝගීන්ට ආහාර ලබා දීමේ දීද බරපතල ප‍්‍රශ්න පවතින බව ද නිරික්ෂණය කළ හැකි වූ අතර සමහර දිනවල දී උදේ ආහාරය ලෙස බත් හා පොල් සම්බෝල පමණක් ලබා දෙන බව ද දැකිය හැකි විය. එමෙන්ම දිවා ආහාරයේ ඉතිරිවන දේ රාත‍්‍රි ආහාර සඳහා ද එක්කරන අවස්ථාවන් නිරික්ෂණය වූ අතර සමහර දිනවලට ප්‍රෝටීන් සහිත කිසිදු ආහරයක් රෝගීන්ට ලබා නොදෙන බව ද දැකිය හැකිවිය. 

ජාතික අක්ෂි රෝහලේ ඉතා දුර බැහැර සිට පැමිණ නේවාසිකව ප‍්‍රතිකාර ලබන රෝගීන් ද සිටින බැවින් මේ පිළිබඳව ඉක්මණින් සොයා බලන්නැයි සෞඛ්‍ය අමාත්‍යවරියගෙන් ඉල්ලා සිටින බව ද නේවාසික රෝගීහු පිරිසක් පැවැසූහ.