(මනෝප‍්‍රිය ගුණසේකර)

පාර්ලිමෙන්තු මන්ත‍්‍රී රන්ජන් රාමනායක මහතා සහ ඇඹිලපිටිය හිටපු මහාධිකරණ විනිසුරු ගිහාන් පිළපිටිය මහතා අතර සිදුවී ඇති දුරකථය සංවාදයන් 12 ක හා වීඩියෝ පටවල පිටපතක් නොපමාව ඉදිරිපත් කරන ලෙස නීතීපතිවරයා වැඩබලන පොලිස්පතිවරයාට අද (12) දැනුම් දුන්නේය.

රන්ජන් රාමනායක මහතා සහ ගිහාන් පිළපිටිය මහතා අතර දුරකථය සංවාදයන් 12 ක් සිදුවී ඇති බව දුරකථන විස්තර වාර්තා අනුව හෙළි වන බව වැඩබලන පොලිස්පතිවරයාගේ අවධානයට ලක් කරන නීතීපතිවරයා ඉදිරි නෛතික පියවර සඳහා ඔවුන් අතර සිදුවී ඇති දුරකථය සංවාදයන් හා වීඩියෝ පටවල පිටපතක් ලබාදීමට පියවර ගන්නා ලෙසද දැනුම් දී ඇතැයි නීතීපතිවරයාගේ සම්බන්ධීකරණ නිලධාරිනී රජයේ ජ්‍යෙෂ්ඨ නීතීඥ නිශාරා ජයරත්න මෙනෙවිය පැවසුවාය.

නීතීපතිවරයා වෙනුවෙන් නියෝජ්‍ය සොලිසිටර් ජනරාල් දිලීප පීරිස් මහතාගේ අත්සනින් වැඩබලන පොලිස්පතිවරයා වෙත නිකුත් කර ඇති මෙම ලිපියේ පිටපත් කොළඹ අපරාධ කොට්ඨාසයේ අධ්‍යක්‍ෂවරයාට හා රජයේ රස පරීක්‍ෂවරයාට ද යොමු කර ඇත.

පාර්ලිමෙන්තු මන්ත‍්‍රී රන්ජන් රාමනායක මහතා ඇඹිලපිටිය හිටපු මහාධිකරණ විනිසුරු ගිහාන් පිළපිටිය මහතා සමඟ එක්වී බොරු සාක්කි සෑදීම සඳහා කුමන්ත‍්‍රණය කළැයි කියන සිද්ධිය සම්බන්ධයෙන් නීතීපතිවරයාගේ උපදෙස් අපේක්‍ෂාවෙන් ඉදිරිපත් කර ඇති උධෘතයන් පරීශීලනය කිරීමෙන් පසුව නීතිපතිවරයා වැඩබලන පොලිස්පතිවරයා වෙත මෙම ලිපිය නිකුත් කර ඇත.

2015 ජනවාරී මස පළමුවැනිදාත් 2019 දෙසැම්බර් මස 31 වැනිදාත් අතර කාලයේදී විනිසුරු ගිහාන් පිළපිටිය මහතා රන්ජන් රාමනායක මහතා සමඟ දුරකථන සංවාදයන් 12ක් සිදුකර ඇති බව දුරකථන විස්තර වාර්තා අනුව අනාවරණය වන බව නීතීපතිවරයා සිය ලිපියේ සඳහන් කර ඇත.

විශ්ලේෂණ සඳහා ඉදිරිපත් කර ඇති දෘඩාකාංග මඟින් දුරකථන සංවාදයන් හා වීඩීයෝ පටවල පිටපත් ලබාගෙන නීතීමය පියවර සඳහා නොපමාව තමාට ලබාදීමට පියවර ගන්නා ලෙසද නීතීපතිවරයා වැඩබලන පොලිස්පතිවරයා වෙත යොමු කළ ලිපිය මඟින් වැඩිදුරටත් උපදෙස් ලබාදී ඇත.