(තිලකරත්න දිසානායක)

"කීරි සම්බා" සහල් යැයි කියා ගම්පහ සතොස  ශාඛාවෙන් පාරිභෝගිකයකු මිලදී ගත්  සහල්  කීරි සම්බා නොවන බවට පරීක්ෂණ වාර්තාවක් මගින් සනාථවීම නිසා එම සතොස ආයතනයට එරෙහිව නීතිමය පියවර ගැනීමට පාරිභෝගික කටයුතු අධිකාරිය පියවර ගෙන ඇත.

පාරිභෝගිකයකු කළ පැමිණිල්ලක් මත ගම්පහ සතොස ශාඛාව වෙතින් ලබාගත් කීරි සම්බා ලෙසින් අලෙවියට තිබූ සහල් සාම්පලයක් , බතලගොඩ වී පර්යේෂණ හා සංවර්ධන ආයතනය මගින් පරීක්ෂාවට ලක් කොට ලබාදී ඇති වාර්තාව පදනම් කරගනිමින් මෙලෙස නීතිමය ක්‍රියාමාර්ග ගැනීමට නියමිතය.

ගම්පහ ප්‍රදේශයේ පාරිභෝගිකයකු  පසුගිය ජනවාරි 26 වෙනි දින ගම්පහ සතොස වෙතින් මිලදීගත් " කීරි සම්බා " කිලෝ පහක ප්‍රමාණය සම්බන්ධයෙන් ඇතිවූ සැකයක් මත මේ පිළිබඳව ගම්පහ අතිරේක දිස්ත්‍රික් ලේකම් සුගත් කිත්සිරි මහතා වෙත දැනුම් දී ඇති අතර මේ පිළිබඳව සොයා බලන ලෙසට පාරිභෝගික කටයුතු අධිකාරියේ ගම්පහ දිස්ත්‍රික් විමර්ශන ඒකකය දැනුවත් කොට ඇත.

මේ අනුව එම ඒකකයේ නිලධාරීන් විසින් ගම්පහ සතොස ආයතනයෙහි අලෙවිය පිනිස තිබූ "කීරි සම්බා " සහල් සාම්පල ලබා ගනිමින් පාරිභෝගික කටයුතු අධිකාරියේ ප්‍රධාන කාර්යාලය හරහා ඉබ්බාගමුව , බතලගොඩ වී පර්යේෂණ හා සංවර්ධන ආයතනය වෙත යොමු කිරීමට පියවර ගෙන තිබිණි.