(රංජිත් රාජපක්ෂ)

හැටන් නුවරඑලිය ප්‍රධාන මාර්ගයේ නානුඔය රදැල්ල කෙටි මාර්ගයේදි වෑන් රථයක් සහ ලොරි රථයක් මුහුණට මුහුණලා ගැටිමෙන් සිදු වු අනතුරකින් වෑන් රථයේ ගමන් ගත් එක් පුද්ගලයෙකු මියගොස් 18 දෙනෙකු තුවාල ලබා නුවරඑලිය දිස්ත්‍රික් මහ රෝහල වෙත ඇතුලත් කල බව නානුඔය පොලිසියේ නිලධාරියෙකු පැවසිය.

මෙම අනතුර සිදු වි ඇත්තේ ඊයේ (01) දින රාත්‍රි 7 ට පමණ හැටන් නුවරඑලිය ප්‍රධාන මාර්ගයේ නානුඔය රදැල්ල කෙටි මාර්ගයේ සමර්සෙට් වත්ත ප්‍රදේශයේදිය. 

අනතුරෙන් මියගොස් ඇත්තේ කල්මුණේ ප්‍රදේශයේ පදිංචි අනිටා මොහොමඩ් අල්සාර් (53) හැවිරිදි පුද්ගලයෙකි.

අධික බැවුමක් සහිත එම මාර්ගයේ නුවරඑලිය සිට හැටන් දක්වා ධාවනය වු ලොරි රථයේ තිරිංග හදිසියේ ක්‍රියා විරහිත විම නිසා ප්‍රතිවිරුද්ධ දිශාවෙන් නුවරඑලිය දෙසට ධාවනය වෙමින් තිබු වෑන් රථයේ ගැටි ලොරි රථය නතර වි ඇත.

කල්මුණේ සයින්දමර්දු ප්‍රදේශයේ පිරිසක් නුවරඑලිය සංචාරයක් සදහා ගමන් කරමින් සිටියදි මෙම අනතුර සිදු වි ඇති බවයි නානුඔය පොලිසිය කියා සිටියේ.

අනතුර සිදුවන අවස්තාවේ වෑන් රථයේ 18 දෙනෙකු සහ ලොරි රථයේ රියදුරා සහ රිය සහයකයා ගමන් කර ඇති බවත්, ඉන් ලොරි රථයේ රියදුරා පමණක් තුවාල ලබා ඇති බවයි පොලිසිය කියා සිටියේ.

අධික බැවුමක් සහිත එම මාර්ගයේ ටොන් පහට වඩා බර වාහන ධාවනය කිරිම තහනම් කර තිබියදි ලොරි රථයේ රියදුරා එය නොතකා ලොරි රථය ධාවනය කර ඇති බවට සිදු කර ඇති මුලික විමර්ෂණවලදි අනාවරණය වි ඇත.

අනතුරෙන් තුවාල ලැබු තුවාලකරුවන් කිහිපදෙනෙකුගේ තත්ත්වය බරපතල බවත්, අනතුරෙන් වෑන් රථයට සහ ලොරි රථයට දැඩි අලාභ හානි සිදු වි ඇති බවයි අනතුර පිලිබදව පරික්ෂණ පවත්වන නානුඔය පොලිසිය කියා සිටියේ.