සෙලින්කෝ ලයිෆ් හි සභාපති ආර්. රෙන්ගනාදන් (වමේ) හා කළමනාකාර අධ්‍යක්ෂ සහ ප්‍රධාන විධායක නිලධාරී තුෂාර රණසිංහ  ​

ලෝකයේ ප්‍රමුඛතම ස්වාධීන සන්නාම ඇගයීමේ සමාගම වන බ්‍රෑන්ඩ් ෆයිනෑන්ස් විසින් ප්‍රකාශයට පත්කළ ශ්‍රී ලංකාවේ 2023 වසරේ වඩාත් වටිනා සන්නාම 100 ශ්‍රේණිගත කිරීමේ දී සෙලින්කෝ ලයිෆ් සන්නාමය ජීවිත හා සාමාන්‍ය රක්ෂණ කාණ්ඩ දෙකම ආවරණව සමස්ත රක්ෂණ ක්ෂේත්‍රයේ වටිනාම සන්නාමය ලෙස ශ්‍රේණිගත වී තිබේ.

බ්‍රෑන්ඩ් ෆයිනෑන්ස් විසින් සෙලින්කෝ ලයිෆ් සන්නාමය සඳහා රුපියල් බිලියන 3.5 ක සන්නාම වටිනාකමක් ලබා දී ඇති අතර එය සාමාන්‍ය රක්ෂණ කාණ්ඩයේ ඉහළම ශ්‍රේණිගත සන්නාමයේ වටිනාකමට වඩා ඉහළ අගයක්ද ගනී. විශාලතම බැංකු, විදුලි සංදේශ සමාගම්, සමූහ ව්‍යාපාර සහ සිල්ලර වෙළඳපොළේ දැවැන්තයන් ඇතුළත් වන බ්‍රෑන්ඩ් ෆයිනෑන්ස්හි ‘ශ්‍රී ලංකා 100’ හි සමස්ත ශ්‍රේණිගත කිරීමේදී 27 වැනි ස්ථානය දක්වා එක් ස්ථානයක් ඉදිරියට සෙලින්කෝ ලයිෆ් සන්නාමය පැමිණ තිබේ.

එමෙන්ම, සෙලින්කෝ ලයිෆ් මෙම වසරේ බ්‍රෑන්ඩ් ෆයිනෑන්ස් වෙතින් 'AA' සන්නාම ශ්‍රේණිගත කිරීමක් ද ලබාගෙන ඇත. එමගින් පිළිඹිබු වන්නේ අවම ණය අවදානමක් සහ මූල්‍ය වගකීම් සපුරාලීමේ ශක්තිමත් හැකියාවයි.

බ්‍රෑන්ඩ් ෆයිනෑන්ස් විසින් ලබාදුන් මෙම නවතම ශ්‍රේණිගත කිරීම පිළිබඳව අදහස් දක්වමින් සෙලින්කෝ ලයිෆ් සමාගමේ කළමනාකාර අධ්‍යක්ෂ සහ ප්‍රධාන විධායක නිලධාරී, තුෂාර රණසිංහ මහතා මෙසේ අදහස් දැක්වීය. “ශ්‍රී ලංකාවේ වටිනා ම ජීවිත රක්ෂණ සන්නාමය ලෙස අපව නිරන්තරයෙන්ම පිළිගැනීමට ලක්වෙනවා. මෙරට මුහුණ දී ඇති අභියෝග හේතුවෙන් සන්නාම වටිනාකම්වල සමස්ත පහත වැටීමක් දක්නට ලැබුණු මෙවැනි වසරක සමස්ත රක්ෂණ ක්ෂේත්‍රයේ ඉහළම ස්ථානයට පැමිණීම මගින් පැවසෙන්නේ, සන්නාමයේ චිරස්ථිතියයි. මෙය සෙලින්කෝ ලයිෆ් සන්නාමය පාරිභෝගිකයන් අතර විශ්වාසය අඛණ්ඩව ගොඩනගා ඇති බව තහවුරු කිරීමකි.”

‘සෙලින්කෝ ලයිෆ් ශ්‍රී ලංකා 100 හි ජීවිත රක්ෂණ කාණ්ඩයේ ඉහළම ශ්‍රේණිගත සන්නාමය ලෙස තම ස්ථානය රඳවා ගැනීමට සමත් වූ අතර ජීවිත රක්ෂණ සමාගම් අතරින් සෙලින්කෝ ලයිෆ් සන්නාම  වටිනාකමෙහි අඩුම පහත වැටීම (2022 මූල්‍ය වර්ෂයට සාපේක්ෂව -9%) වාර්තා කර ඇත’ යැයිද බ්‍රෑන්ඩ් ෆයිනෑන්ස් පවසයි.

595