(අංජුල මහික වීරරත්න)

2025 අතර මැදි කන්නයේ මුං අස්වනු මිල දී ගැනීමට කැබිනට් අනුමැතිය ලැබී ඇත.        

කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශයේ මග පෙන්වීම මත ක්‍රියාත්මක කරන ලද 2025 මුං වගාවේ ඵලදායිතාව හා නිෂ්පාදනය ඉහළ නැංවීමේ වැඩසටහන යටතේ 2025 යල කන්නයේ හා අතරමැදි කන්නයේ හෙක්ටයාර 16,500ක පමණ භූමි ප්‍රමාණයක මුං වගා කර තිබේ. එමඟින්, මුං ඇට මෙට්‍රික්ටොන් 14,600ක පමණ අස්වැන්නක් අපේක්ෂා කරන අතර, එම අස්වැන්නෙන් මෙට්‍රික්ටොන් 12,000 ක් පමණ සෘජුවම දේශීය වෙළෙඳ පොළට පැමිණෙනු ඇතැයි අපේක්ෂා කෙරේ. 

මේ වන විට හම්බන්තොට දිස්ත්‍රික්කයේ මුං ඇට අස්වනු නෙළීම ආරම්භ කර ඇති අතර, අතර මැදියන් විසින් කිලෝග්‍රෑම් එකක් රුපියල් 450 ක පමණ අඩු මුදලකට එම අස්වනු මිල දී ගන්නා බවට වාර්තා වී ඇත. එබැවින්, ගොවීන්ට සිය නිෂ්පාදන සඳහා සාධාරණ මිලක් ලබා දීමට හැකි වන පරිදි, කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යාංශයේ උපදෙස් මත ජාතික ආහාර ප්‍රවර්ධන මණ්ඩලය විසින් ගොවීන්ගෙන් මුං ඇට අස්වැන්න මිල දී ගැනීමේ වැඩසටහනක් ආරම්භ කර තිබේ.

එම වැඩසටහන තවදුරටත් ව්‍යාප්ත කරමින් පුද්ගලික අංශය සමඟ තරගකාරී අයුරින් මුං ඇට අස්වැන්න මිල දී ගැනීම සඳහා අවශ්‍ය ප්‍රතිපාදන සලසා දීම පිණිස කෘෂිකර්ම, පශු සම්පත්, ඉඩම් සහ වාරි මාර්ග අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.