(සුජිත් හේවාජුලිගේ සහ අංජුල මහික වීරරත්න)

මාර්ග සංවර්ධන කටයුතු කඩිනම් කිරීම සඳහා එම කටයුතු නව කොන්ත්‍රාත්කරුවන්ට ලබා දෙන බව මහාමාර්ග අමාත්‍ය ජොන්ස්ටන් ප්‍රනාන්දු මහතා පැවසීය.

මාර්ග සංවර්ධන ව්‍යාපෘති සඳහා නව කොන්ත්‍රාත්කරුවන් සොයා ඔවුන්ගේ ශක්‍යතාවන් වහා සොයාබලන ලෙස අමාත්‍යවරයා මහාමාර්ග අමාත්‍යාංශයේ ලේකම් ආර්.ඩබ්ලිව්.ආර්. පේමසිරි මහතා ඇතුළු නිලධාරීන්ට උපදෙස් දුන්නේය.

මහාමාර්ග ඇමතිවරයා මහතා මෙසේ උපදෙස් ලබා දුන්නේ මහාමාර්ග කටයුතු පිළිබඳ අමාත්‍යාංයීය උපදේශක කාරක සභාව පාර්ලිමේන්තුවේදී පසුගිය ( 19 ) රැස්වූ අවස්ථාවේදීය.

මේ අතර මාතර, මහනුවර, රත්නපුර, ගම්පහ, බදුල්ල, හම්බන්තොට, මාතලේ, කලුතර ඇතුළු දිවයින පුරා දිස්ත්‍රික්ක රැසක මාර්ග සංවර්ධනය ඉක්මන් කරන ලෙස මහාමාර්ග අමාත්‍යවරයා නිලධාරීන්ට උපදෙස් ලබා දුන්නේය.

ලංකාවේ සංචාරක කර්මාන්තය ක්‍රමයෙන් වර්ධනය වන බැවින් ගාල්ල, රූමස්වල, උනවටුන ආදී සංචාරක කලාපයන්හි මාර්ග ඉක්මනින් සංවර්ධනය කිරීමේ අවශ්‍යතාවය මෙහිදී පාර්ලිමේන්තු මන්ත්‍රී චන්දිම වීරක්කොඩි මහතා පෙන්වාදුන්නේය.

මේ අවස්ථාවේදී අදහස් දැක්වූ පාර්ලිමේන්තු මන්ත්‍රීනී ඩයනා ගමගේ මහත්මිය බ්‍රිතාන්‍ය ජාතිකයින් ඉදි කළ ඉතා පැරණි යකඩ පාලම් සංවර්ධනය කර එම ස්ථාන ඉතා ආකර්ෂණීය සංචාරක ගමනාන්ත බවට පත්කළ හැකි බව පෙන්වා දුන්නාය.

දෙමෝදර ආරුක්කු පාලම වැනි ඉතා වටිනා සහ සංචාරකයන් ආකර්ෂණය කරගත හැකි ස්ථාන පවතින හෙයින් එම ස්ථාන සංවර්ධනය කිරීම සංචාරක ආකර්ෂණයට ඉතා වැදගත් විය හැකි බවද සඳහන් කළාය.

එය ඉතා වැදගත් යෝජනාවක් බවත් ඒ සම්බන්ධයෙන් පියවර ගන්නා බවත් ජොන්ස්ටන් ප්‍රනාන්දු මහතා මෙහිදී ප්‍රකාශ කළේය.

මාතර නව නගරයේ සිට ගොඩගම අධිවේගී මාර්ගය දක්වා මාර්ගයේ කටයුතු පිළිබඳ වැඩි අවධානය යොමු කළ යුතු බව මාතර දිස්ත්‍රික් මන්ත්‍රී වීරසුමන වීරසිංහ මාතා මෙහිදී පෙන්වා දුන්නේය

මාර්ග සංවර්ධනයේදී නිවැරදි ක්‍රියාමාර්ග ඉක්මනින් ගැනීම ඉතා වැදගත් බවත් ඒ සඳහා අවශ්‍ය කටයුතු කඩිනමින් ‍ක්‍රියාත්මක කරන බවත් ඇමතිවරයා පැවසුවේය .

මෙම රැස්වීමට නියෝජ්‍ය කාරක සභා සභාපති අංගජන් රාමනාදන්, අමාත්‍ය නිමල් සිරිපාල ද සිල්වා රාජ්‍ය අමාත්‍යවරුන් වන දයාසිරි ජයසේකර , නිමල් ලංසා සහ ජානක වක්කුඔුර පාර්ලිමේන්තු මන්ත්‍රීවරුන්වන සම්පත් අතුකෝරල, ඉසුරු දොඩන්ගොඩ, කාදර් මස්තාන්, ගුණතිලක රාජපක්ෂ, වී. රාධක්‍රිෂ්ණන්, අමරකීර්ති අතුකෝරල සහ එච්. නන්දසේන යන මහත්වරුන් ඇතුළු පිරිසක්ද සහභාගී වූහ .