(සුජිත් හේවාජුලිගේ සහ  අංජුල මහික වීරරත්න)

පසුගිය වසර තුනේදී  දුම්රිය (ගමන් වාර)  171ක්     ප්‍රමාදවී ධාවනයවී ඇතැයි  රජයේ ගිණුම් පිළිබඳ පාර්ලිමේන්තු කාරක සභාවේදී  (කෝපා කමිටුව) තොරතුරු අනාවරණයවිය.

මේ අනුව දුම්රිය ගමන් වාර 46 ක් ගිය වසරේද   දුම්රිය ගමන් වාර  61 ක්  2023 වර්ෂයේද දුම්රිය ගමන් වාර 64ක් 2022 වර්ෂයේද ප්‍රමාදවී ධාවනයවී ඇති බව  කමිටුව පවසයි

දුම්රිය අවලංගුවීම හේතුවෙන් සිදුවන දෛනික පාඩුව සම්බන්ධයෙන් විගණනයක් කරන ලෙස කෝපා කමිටුව නිර්දේශ කළේය

එසේම එක් එක් දුම්රියට අදාල ආදායම් වියදම් වාර්තාවක් සකස් කරන ලෙසත්  දෛනිකව සිදුවන දුම්රිය ප්‍රමාදවීම් සහ ඒවා වලක්වා ගැනීමට ගන්නා පියවර පිළිබඳ වාර්තාවක් අමාත්‍යංශයට ඉදිරිපත් කරන ලෙසත්   කමිටුව  උපදෙස්දී ඇත.

මෙසේ නිර්දේශ ඉදිරිපත් කෙරුණේ  ශ්‍රී ලංකා දුම්රිය දෙපාර්තමේන්තුවේ 2023 වර්ෂයේ විගණකාධිපති වාර්තාව හා වර්තමාන කාර්යසාධනය සම්බන්ධයෙන් සාකච්ඡා කිරීමට රජයේ ගිණුම් පිළිබඳ කාරක සභාව   පාර්ලිමේන්තු මන්ත්‍රී අරවින්ද සෙනරත් මහතාගේ සභාපතිත්වයෙන් පසුගියදා (05) වැනිදා  පාර්ලිමේන්තුවේදී රැස්වූ අවස්ථාවේදීය.

දුම්රිය දෙපාර්තමේන්තුවේ විගණන හා කළමනාකරණ කමිටු රැස්වීම් ප්‍රමාණවත් නොවීම පිළිබඳව කමිටුවේ අවධානය යොමුවිය.