නෙස්ලේ ලංකා සමාගම ‘Good Food Good Life’ තේමාව සමඟින් එක්ව සිටින ව්‍යාපාරික හවුල්කාරීත්වයන් ඇගයීම වෙනුවෙන් පසුගිය ‘Connect@Nest’24’ උත්සවය පවත්වන ලදී. රසයෙන් හා ගුණයෙන් සපිරි නිෂ්පාදන ශ්‍රී ලාංකේය පාරිභෝගිකයන්ට  ලබා දීමේ නෙස්ලේ සමාගමේ අරමුණු සමඟ අත්වැල් බැඳගත් විවිධ ව්‍යාපාරික හවුල්කරුවෝ මෙම අවස්ථාවට  එක්ව සිටියහ.

වසර 115කට වැඩි අභිමානවත් ඉතිහාසයකට උරුමකම් කියන නෙස්ලේ ලංකා සමාගම සිය විශ්වාසවන්ත හවුල්කරුවන් සමඟ එක් වෙමින් වත්මන් ශ්‍රී ලාංකේය ප්‍රජාවගේ මෙන්ම අනාගත පරපුරේ ජීවන තත්වය ඉහළ නැංවීම වෙනුවෙන් ගුණාත්මක නිෂ්පාදන ලබා දීමට කැපවී කටයුතු කරයි.

විශේෂයෙන් ශ්‍රී ලංකාවේ විශාලතම ආහාර පාන සැපයුම්කරු ලෙස මෙන්ම ජනප්‍රිය සන්නාම රැසක උරුමකරු ලෙස ළදරුවාගේ සිට වැඩිහිටියන් දක්වා සෑම වයස් කාණ්ඩයකටම ගැළපෙන රසවත් හා පෝෂණීය ආහාරපාන සැපයීමට නෙස්ලේ ලංකා කටයුතු කරනු ලබයි.

ගොවිපොළේ සිට පරිභෝජනය දක්වා සෑම පියවරකදීම ඉහළම තත්ව ප්‍රමිතීන් පවත්වාගෙන යාමට කටයුතු කර ඇති නෙස්ලේ ලංකා සමාගම ඒ වෙනුවෙන් සිය ව්‍යාපාරික හවුල්කරුවන්ගේ ශක්තිය හා සහයෝගය ලබා ගැනීමටද කටයුතු කර ඇත්තේ උසස් තත්වයේ නිෂ්පාදන පාරිභෝගිකයන් වෙත තිළිණ කරමිනි.

මේ සම්බන්ධයෙන් අදහස් දැක්වූ නෙස්ලේ ලංකා සමාගමේ කළමනාකාර අධ්‍යක්ෂ බර්නි ස්ටෙෆන් මහතා මෙසේ පැවසීය. “අපගේ ව්‍යාපාරික හවුල්කරුවන් සමඟ නිරන්තර විශ්වාසය ගොඩනගා ගැනීමට කටයුතු කරන අප ඔවුන් සවිබල ගැන්වීම හා හොඳම භාවිතයන් ඔවුන් වෙත ලබා දීමට අවධානය යොමු කර තිබෙනවා.

විශිෂ්ටත්වය වෙනුවෙන් අපගේ කැපවීම ඒ තුළින් තහවුරු කිරීමට අපි කටයුතු කළා. ශ්‍රී ලංකාව පුරා විසිරී සිටින අපගේ සුවහසක් පාරිභෝගිකයන් වෙත රසයෙන් හා ගුණයෙන් පිරිපුන් නිෂ්පාදනයක් ලබා දීමේ අපගේ අරමුණු සාක්ෂාත් කර ගැනීම සඳහා කැපවී සිටින ව්‍යාපාරික හවුල්කරුවන් ඇගයීමේ සුවිශේෂී අවස්ථාවක් ලෙස ‘Connect@Nest’24’ සඳහන් කළ හැකියි.”

මෙහිදී අදහස් දැක්වූ නෙස්ලේ ලංකා සමාගමේ සැපයුම් දාම අධ්‍යක්ෂ කාංචන ප්‍රනාන්දු මහතා මෙසේ පැවසීය. “අභියෝගාත්මක කාලයන්හිදී මුහුණ දුන් දුෂ්කරතා ජය ගනිමින් පාරිභෝගිකයන්ට  තත්වයෙන් උසස් නිෂ්පාදන ලබා දීම සඳහා අපගේ ව්‍යාපාරික හවුල්කරුවන්ගේ කැපවීම සුවිසල් ශක්තියක් වූ බව සඳහන් කළ හැකියි. 

ඔවුන් අප වෙත ලබා දෙන අඛණ්ඩ සහයෝගය ඇගයීම වෙනුවෙන් ‘Connect@Nest’24’ වැඩසටහන සංවිධානය කිරීමට අපි කටයුතු කළා. ඒ තුළින් ශ්‍රී ලාංකේය පාරිභෝගිකයන්ගේ තෘප්තිය වෙනුවෙන් අපගේ ගමනට සහයෝගය දැක්වීම සඳහා  ඔවුන්ගේ උත්සාහය හා කැපවීම අගයනු ලැබුවා.’’

-595