(යොහාන් භාසුර)

කොළඹ අධ්‍යාපන කලාපය තුළ පිහිටි බාලක පාසලක දරුවන් අමානුෂික ලෙස දණ්ඩණයට ලක් කිරීමේ චෝදනාවට ගුරුවරයකු අත්අඩංගුවට ගැනීමට සොයන බවත් බදුල්ල ප්‍රදේශයේ පදිංචිකරුවකු වන අදාළ ගුරුවරයා සැඟවී සිටින බවත් කාන්තා හා ළමා කටයුතු අමාත්‍යංශය පැවසීය.

සමාජ මාධ්‍ය තුළ සංසරණය වන පුවතක් සම්බන්ධව මූලික විමර්ශන කටයුතු අවසන් කර දණ්ඩ නීති සංග්‍රහයේ 308 වගන්තිය යටතේ ඉහත සිද්ධිය සම්බන්ධව අධිකරණයට කරුණු වාර්තා කළ බවත් අදාළ සැකකරු බදුල්ල ප්‍රදේශයේ පදිංචිකරුවකු වන අතර ඔහු මේ වන විට සැගව සිටින බැවින් ඔහු සොයා අත්අඩංගුවට ගැනීම වෙනුවෙන් විශේෂ පොලිස් මෙහෙයුමක් ක්‍රියාත්මක බවත් එම අමාත්‍යංශය සඳහන් කළේය.

කොළඹ අධ්‍යාපන කලාපය තුළ පිහිටි බාලක පාසලක ප්‍රාථමික අංශයේ පන්ති භාර ගුරුවරයකු වන සැකකරු තමා භාර තුන්වන ශ්‍රේණියට අදාළ පන්තියේ ඉගෙනුම ලබන දරුවන්ට "ලෝහමය පටියක්" ආධාරයෙන් පහර දෙමින් දණ්ඩනයට ලක් කර ඇති බවට මේ මස 08 වැනි දින ලද පැමිණිල්ලකට අනුව කාන්තා සහ ළමා කටයුතු අමාත්‍යාංශයට අනුබද්ධිත ජාතික ළමා ආරක්ෂක අධිකාරියේ විශේෂ විමර්ශන ඒකකය විමර්ශනයක් ආරම්භ කළ බවද එම අමාත්‍යංශයේ සඳහන් කළේය.

ඒ අනුව දණ්ඩණයට ලක්වූ අවුරුදු 7 ක් පමණ වයසැති පිරිමි දරුවන් දෙදෙනකුගෙන් ප්‍රකාශ සටහන් කරගෙන ඇති අතර අදාළ පාසලේ නියෝජ්‍ය විදුහල්පති සහ මවිපියන්ගේ ද ප්‍රකාශ සටහන් කරගත් බව කී එම අමාත්‍යංශය විශේෂ විමර්ශන කණ්ඩායම විසින් අදාළ සිදුවීම් සිදු වූ ස්ථානය ස්ථානීය පරීක්ෂාවට ද කළ බව සඳහන් කළේය.