(සුජිත් හේවාජුලිගේ සහ අංජුල මහික වීරරත්න)

දුම්රිය දෙපාර්තමේන්තුවේ දුම්රිය එන්ජින් සහ බලවේග කට්ටල 267න්  90ක් අවුරුදු 40ට වඩා පැරණි එ්වා   බව රජයේ ගිණුම් පිළිබඳ පාර්ලිමේන්තු කාරක සභාවේදී (කෝපා කමිටුව) තොරතුරු අනාවරණය විය

එසේම අවුරුදු 20 ත් 30ත් අතර පැරණි   දුම්රිය එන්ජින් සහ බලවේග කට්ටල 69 ක්ද  අවුරුදු 10ත් 20ත් අතර පැරැණි දුම්රිය එන්ජින් සහ බලවේග කට්ටල  62ක්ද  අවුරුදු 10ට අඩු දුම්රිය එන්ජින් සහ බලවේග කට්ටල 46ක්ද  පවතින බව  එහිදී හෙළි වී යැයි කෝපා කමිටුව පවසයි.

මේ අතර  2020 සිට 2024 දක්වා ක‍ාලයේදී  දුම්රියේ ගැටීමෙන්  වන අලි 53ක් මියගොස් ඇති බවත් 17ක්  තුවාල ලබා ඇති බවත් කෝපා කමිටුවේදී අනාවරණය විය.

මේ පිළිබඳ තොරතුරැ  අනාවරණය වූයේ ශ්‍රී ලංකා දුම්රිය දෙපාර්තමේන්තුවේ 2023 වර්ෂයේ විගණකාධිපති වාර්තාව හා වර්තමාන කාර්යසාධනය සම්බන්ධයෙන් සාකච්ඡා කිරීමට  රජයේ ගිණුම් පිළිබඳ කාරක සභාව (COPA)   පාර්ලිමේන්තු මන්ත්‍රී අරවින්ද සෙනරත් මහතාගේ සභාපතිත්වයෙන් පසුගිය  (09) දා  පාර්ලිමේන්තුවේදී රැස්වූ අවස්ථාවේදීය.

මෙහිදී කමි‍ටුව පෙන්වා දුන්නේ වන අලි අනතුරු අවම කර ගැනීම සඳහා 2018 ඔක්තෝම්බර් මස 11 දින සිට 15 දින දක්වා සමීක්ෂණයක්  කර වන අලි දුම්රියේ ගැටීමේ ස්ථාන හා වන අලි දුම්රිය මාර්ගයේ ගැවසෙන ස්ථාන පිළිබඳ අධ්‍යයනයක්  කර තිබුණත් වන අලි දුම්රියේ ගැටීම අවම වී නැති බවයි.

මෙහිදී නිලධාරීන් පෙන්වා දුන්නේ 2018 පැවති තත්ත්වය මේ වන විට වෙනස් වී ඇති බවත් මෑත කාලීනව අලි 200 පමණ දිනපතා දුම්රිය මාර්ග අවට ගැවසෙන බවට  හඳුනාගෙන ඇති බවයි. මේ නිසා දැනටමත් කෙටි කාලීන විසඳුම් ලබාදී ඇති බවත් මේ වන විට වන ජීවී දෙපාර්තමේන්තුව සමග සාකච්ඡා කරමින් දීර්ඝකාලීන විසදුම් ලබාදීම සම්බන්ධයෙන් අවශ්‍ය පියවර ගනිමින් සිටින බවත් නිලධාරීහු පෙන්වා දුන්හ.