(ගයාන් සූරිය ආරච්චි)

2012 දී ඝාතනයට ලක් වූ රගර් ක්‍රීඩක වසීම් තජුඩින් මියගොස් සිටි රථයට පිටුපසින් පැමිණි සැක කටයුතු රථයක මිද්දෙණියේ දී ඝාතනයට ලක් වූ අරුණ විදාන ගමගේ හෙවත් " කජ්ජා " නැමැත්තා සිට ඇති බව ඔහුගේ බිරිය අනාවරණය කළ බව වැඩ බලන පොලිස් මාධ්‍ය ප්‍රකාශක සහකාර පොලිස් අධිකාරී මිනුර සෙනරත් මහතා ඊයේ පැවසීය.

ඔහු මේ බව පැවසුවේ බත්තරමුල්ල සුහුදු පාය පොලිස් මාධ්‍ය කොට්ඨාසයේ පැවති විශේෂ මාධ්‍ය හමුවකටට එක්වෙමිනි.

කජ්ජා නමැත්තාගේ බිරිය  ස්වේච්ඡාවෙන් අපරාධ පරීක්ෂණ දෙපාර්තමේන්තුව වෙත පෙනී සිට මෙම ප්‍රකාශය දුන් අවස්ථාවකදී බවද වැඩ බලන පොලිස් මාධ්‍ය ප්‍රකාශකවරයා කීය.

කොළඹ නාරාහේන්පිට ශාලිකා ක්‍රීඩාංගනය අසල පිලිස්සී ගිය මෝටර් රථයකයක තිබී රගර් ක්‍රීඩක වසීම් තජුඩින් නැමැත්තාගේ සිරුර 2012 වසරේ මැයි මාසයේ දිනක හමුවී තිබුණි.

එම කාලවකවානුවේ පොලිසිය සිදු කළ විමර්ශනවලදී එය හදිසි අනතුරකින් සිදු වූ මරණයක් බවට ප්‍රකාශ කර තිබුණද එම රගර් ක්‍රීඩකයාගේ ඥාතීන් විසින් එය හදිසි අනතුරකින් සිදු වූ මරණයක් නොවන බව පවසමින් ඒ සම්බන්ධයෙන් ස්වාධීන පරීක්ෂණයක් සිදු කරන ලෙසත් ඉල්ලා තිබුණි.

ඒ අනුව 2015 වර්ෂයේදී අපරාධ පරීක්ෂණ දෙපාර්තමේන්තුව තජුඩින්ගේ මරණය සම්බන්ධයෙන් සිදුකළ විමර්ශන වලින් අනතුරුව එම මරණය මිනී මැරුමක් බවට කරුණු අනාවරණය වී ඇති බවට කොළඹ මහේස්ත්‍රාත් අධිකරණයට විශේෂ වාර්තාවක් ඉදිරිපත් කරනු ලැබීය.

කෙසේ වෙතත් අපරාධ පරීක්‍ෂණ දෙපාර්තමේන්තුවෙන් නිලධාරීන් විසින් වසිම් තජුඩින් මහතාගේ මරණය සම්බන්ධයෙන් සිදුකළ සිසි ටීවී දර්ශන පරීක්ෂණවලින් අනාවරණය කරගත් තොරතුරුවලට අනුව තාජුඩීන් නැමැත්තා හැව්ලොක්ටවුන් ප්‍රදේශයේදී සුපිරි වෙළඳ සැලකට ගොස් වතුර බෝතලයක් රැගෙන නැවත මෝටර් රථයට නගින අවස්ථාව සටහන් වී ඇති බව කී පොලිස් මාධ්‍ය ප්‍රකාශකවරයා කියා සිටියේ එම මෝටර් රථය අසල තවත් පුද්ගලයෙකු සිටින බවත් ඔහුගේ මෝටර් රථය පිටුපසින් තවත් නාඳුනන මෝටර් රථයක් පසුපසින් ගමන් කරන බවත් නිරීක්ෂණය වී තිබූ බවය.

එම සීසී ටීවී දර්ශන එකල අපරාධ පරීක්ෂණ දෙපාර්තමේන්තුව විසින් මාධ්‍ය වෙත නිකුත් කර තිබූ නමුත් කිසිවකුට එම පුද්ගලයා සම්බන්ධයෙන් තොරතුරක් ලබාදීමට හැකියාවක් නොතිබුණු බව වැඩ බලන මාධ්‍ය ප්‍රකාශකවරයා පැවසීය.