(ඩයනා උදයංගනී)

අර්බුදයෙන් රට ගොඩගැනීම සඳහා ජනතාවගේ පැත්තේ සිට රජයට උදව් කිරීමට තම කණ්ඩායම සූදානම් බව පාර්ලිමේන්තු මන්ත්‍රී ඩලස් අලහප්පෙරුම මහතා  පැවසීය.

ජනාධිපති රනිල් වික්‍රමසිංහ මහතා සිය රාජාසන කතාවේදී අලංකාර වචන භාවිතා කළ බව කී අලහප්පෙරුම මහතා මහජන ප්‍රශ්නවලට සංවේදී නම් එය ප්‍රදර්ශනය කළ යුත්තේ වචනවලින් නොව ඉන් ඔබ්බට ගිය ක්‍රියාවෙන් බව ද සඳහන් කළේය.

මහජන පීඩනය හා ආතතිය සමඟ ගණුදෙනු කිරීමේදී සංවේදී වන ලෙස තම කණ්ඩායම ජනාධිපතිවරයාගෙන් හා අගමැතිවරයාගෙන් ඉල්ලීමක් කළ බවත්, ඉන්ධන පෝලිම්වල 26ක් මියගොස් ඇති තත්වයකදී තුළ මර්දනයේ යන්ත්‍රයක් තුළින් ජනතා පීඩනය යට කළ හැකි බව සිතනවා නම් එසේ සිතන අය ලෝක ඉතිහාසයේ එසේ ක්‍රියා කළ නායකයන්ට අත්වූ ඉරණම ගැන යළි සිතාබැලිය යුතු බව ද ඩලස් අලහප්පෙරුම මහතා කීවේය.

මෙම අවස්ථාවේදී මහජන බදු මුදල් ඇමතිවරුන්ගේ වරප්‍රසාද වරදාන ලෙස භාවිතා නොකරන ලෙස තම කණ්ඩායම ජනාධිපතිවරයාගෙන් ඉල්ලීමක් කළ බව ද මන්ත්‍රීවරයා පැවසීය.  

ඩලස් අලහප්පෙරුම මහතා මේ බව පැවසුවේ කොළඹ දී අද (5) පැවති මාධ්‍ය හමුවක් අමතමිනි.

ශ්‍රී ලංකා පොදුජන පෙරමුණේ සභාපති, පාර්ලිමේන්තු මන්ත්‍රී මහාචාර්ය ජී.එල් පීරිස් මහතා මෙහිදී පැවසුවේ ප්‍රධාන දේශපාලන පක්‍ෂ අතර සම්මුතියක් ඇතිකරගෙන ජනතාවට යහපතක් වෙන සියලු දේට රජයට සහය ලබාදෙන බවත්, එහිදී ඇමතිධූර හෝ කිසිම තනතුරක් භාරනොගන්නා බවත්ය.

මේ අවස්ථාවේ කැබිනට් මණ්ඩලය තර නොකර ජනතාවට අවශ්‍ය දේට මූලිකත්වයදීම සඳහා මුදල් වෙන්කළ යුතු අතර, ඇමතිවරුන්ගේ හා රාජ්‍ය ඇමතිවරුන්ගේ සුඛ විහරණය සඳහා ඒ මුදල් යෙදවීම සුදුසු නැතැයි ද මහාචාර්යවරයා පැවසීය.