(යොහාන් භාසුර)

කොළඹ මහ නගර සභාවේ ඡන්ද ප්‍රතිඵලයට අනුව කොළඹ ජනතාව බහුතරයක් වර්තමාන ආණ්ඩුවට බලය දීම සුදුසු නැතැයි තීරණය කර ඇති බවත් ඒ හේතුවෙන් වර්තමාන ආණ්ඩුවට කොළඹ නගර සභාවේ බලය පිහිටුවීමට පසුබිම සැකසීමට ඉඩනොතබන බවත් ශ්‍රී ලංකා පොදුජන පෙරමුණේ මහ ලේකම්, නීතිඥ සාගර කාරියවසම් මහතා අද (27) පැවසීය.

බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණ මූලස්ථානයේදී අද (27) පැවැති මාධ්‍ය හමුවේදී නීතිඥ සාගර කාරියවසම් මහතා එසේ පැවසීය.  

ශ්‍රී ලංකා පොදුජන පෙරමුණ පක්ෂයක් හැටියට විපක්ෂයේ අනෙකුත් පක්ෂ, බහුතරයක් ලබාගත්ත පක්ෂ මේ සම්බන්ධයෙන් ගන්නා පියවර, කවුද ඉදිරිපත් කරන්නේ යන කාරණා මෙන්ම අණ්ඩුවට විරුද්ධ බලවේගයකට අවශ්‍ය සහය දීම සම්බන්ධයෙන් ප්‍රශ්නයක් නොමැති බවත් නමුත් එහිදි ඒ ඒ පක්ෂවලට, ඒ ඒ පුද්ගලයාට උදව් කරනවා කියන කාරණය මත පදනම්ව කටයුතු නොකරන බවත් කාරියවසම් මහතා කීය.

ජනතා මතය කියන කාරුණ ඉදිරියෙන් තබාගෙන පමණක් කිසියම් පක්‍ෂයකට හෝ කණ්ඩායමකට බලය පිහිටුවීමට සහය දෙන බව කී ඒ මහතා රටේ අනාගතය සම්බන්ධයෙන් එම පක්‍ෂයට වෙනස් ආකල්පයක් ඇති බව ද සඳහන් කළේය.