(තිලකරත්න දිසානායක)

අත්තනගලු ඔයෙහි දාරළුව ප්‍රදේශයේ තිබී ඉකුත් 5 වෙනි දින සොයා ගත් මළ සිරුර සම්බන්ධයෙන් විමර්ශන සිදු කළ ගම්පහ මූලස්ථාන පොලීසිය මගින් මෙය මනුෂ්‍ය ඝාතනයක් බවට ඇතිවූ සැකය මත බැලුම්මහර ප්‍රදේශයේ පුද්ගලයන් තිදෙනකු අත් අඩංගුවට ගනු ලැබූ බව පොලීසිය සඳහන් කරයි.

ඔයෙහි තිබී හමුව ඇති මළ සිරුර බැලුම්මහර ප්‍රදේශයේ පදිංචිව සිටි සුරංග ද සිල්වා නමැති 40 හැවිරිදි විවාහක පුද්ගලයකුගේ බවට පොලීසිය හදුනාගෙන ඇති අතර මළ සිරුර සම්බන්ධයෙන් සිදු කළ මරණ පරීක්ෂණයේදී අධිකරණ වෛද්‍ය නිලධාරීවරයා විසින් විවෘත තීන්දුවක් ලබා දුන්නේය.

අනතුරුව මෙය ඝාතනයක් ලෙස සලකා සිදු කළ වැඩි දුර විමර්ශනයට අනුව බැලුම්මහර සහ ගම්පහ ප්‍රදේශයේ පදිංචි වයස 39 සහ 46 අතර වයසේ පසුවන පුද්ගලයන් තිදෙනකු අත් අඩංගුවට ගනු ලැබූ බව පොලීසිය පවසයි.

මොවුන්ගෙන් සිදු කළ ප්‍රශ්න කිරීමේදී ඝාතනයට ලක්වූ අය තැනැත්තාට අයත් යතුරු පැදියද අත්තනගලු ඔයට දැමූ බවට අනාවරණයවීම මත අද (9) සවස නාවික හමුදා කිමිදුම් කරුවන් කැදවා එම යතුරු පැදිය ගොඩ ගැනීමට පියවර ගෙන තිබිණි.