(ඩයනා උදයංගනී)

දුම්රිය ගැටලු විසඳීම සඳහා තමන්ට වසරක කාලයක් ලබාදෙන්නැයි කැබිනට් ප්‍රකාශක, ප්‍රවාහන, මහාමාර්ග සහ ජනමාධ්‍ය අමාත්‍ය, ආචාර්ය බන්දුල ගුණවර්ධන මහතා පැවසීය.

දුම්රිය මාර්ග නිසි ලෙස නඩත්තු නොකිරීම හා මාර්ග නඩත්තුවට සේවකයන් හිඟවීම නිසා දුම්රිය පීලි පැනීම වැනි ගැටලු මතුවන බව කී ඇමතිවරයා මාර්ග යළි සැකසීමත්, හැකි මාර්ග විදුලි දුම්රිය බවට පරිවර්තනය කිරීමටත් වසරක කාලයක් තුළ උත්සාහ කරන බව ද සඳහන් කළේය.

බන්දුල ගුණවර්ධන මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේ දී අද(24) පැවති කැබිනට් තීරණ දැනුම්දීමේ මාධ්‍ය හමුවේදී මාධ්‍යවේදියෙකු නැගූ පැනයකට පිළිතුරු දෙමිනි.

පීලි 10,000ක් මිලදී ගැනීමටත්, මේ වන විට බහුකාර්ය සේවකයන් ලෙස බඳවාගෙන සිටින අයෙගෙන් 3000ක් ලබන මාසයේ දී දුම්රිය දෙපාර්තමේන්තුවට අනුයුක්ත කරගැනීමටත් කටයුතු කරමින් සිටින බව ද ඇමතිවරයා පැවසීය.

අවිස්සාවේල්ල සිට කොළඹ දක්වා දුම්රිය මාර්ගය විදුලි දුම්රිය මාර්ගයක් බවට පරිවර්තනය කිරීමට සහය දෙන ලෙස තමන් ඉන්දීය විදේශ ඇමතිවරයාගෙන් ඉල්ලීමක් කර තිබෙන බව ද ගුණවර්ධන මහතා කීවේය.