සුන්දර නෝර්වේ කඳු අතරින් නෞකා සවාරියක්

ගෙයිරංගෆියෝඞ් හරහා යාත‍්‍රා කරමින්

දුරින් දුරට ඇදී යන කඳු වළලූ, වැව්, දියඇලි සහ ජලාශවලින් සමත්විත මහේක්ෂ භූමි දර්ශනයෙන් වශීකෘත වෙමින් අපි ශිඛර මුඳුනෙහි ඉතා නැවුම් වාතය ලය පුරා ආශ්වාස කළෙමු.

බි‍්‍රක්ස්ඩාල් ග්ලැසියරයේ දිය පහරක් හරහා තනා ඇති පාළමක්

බියුලා හා ගොඞ්රිඞ්ජ්

නැවැත වරක් මනස්කාන්ත දර්ශන, සුන්දර මතකයන් හා විශ්මයන් ගණනාවක් විඳි දිනයක් අවසානයේ අප නැවත පස්වරු හය වනවිට නෞකාවට ගොඩවූයේ අපගේ මීළඟ ගමනාන්තය වන ගෙයිරෙන්ජර් ෆියෝඞ් බලා යාමටය. ගෙයිරේන්ජර් ෆියෝඞ් යනු ස්වකීය අනූපම සුන්දරත්වය නිසා 2005 වසරේදී යුනෙස්කෝ ලෝක උරුමයක් ලෙස නම් ලද කුඩා ගම්මානයකි.

එය හිම ශිඛර පැළැඳි හරිත කඳුවැටිවලින් වට වී තිබේ. ‘සෙවන් සිස්ටර්ස්’ හෙවත් ‘සොයුරියන් සත් දෙනා’ නමින් හඳුන්වන සුන්දර දියඇලි මේ කඳුකර ගම්මානයට දර්ශනය වේ. ‘ඊගල් රෝඞ්’ මාවතෙහි වට වංගු එකොලහ පසු කරමින් ඉහළට ඇදෙන විට හිසකෙස් කෙළින් සිට ගනී. එකොලොස් වෙනි වංගුව පසුකොට පහළ බලන විට අප පැමිණි නෞකාව පහත නැංගුරම් ලා තිබෙනු පෙනේ. ‘ඩැල්ස්නිබා’ කඳු ශිඛරයද, ඒ හාම දර්ශනය වේ.

ගෙයිරේන්ජර්හිදී නැවැත වරක් අපේ කණ්ඩායම දෙකට බෙදුනි. එක් කොටසක් නෝර්ඩාල් නිම්නයෙහි පිහිටි සාම්ප‍්‍රදායික ගොවිපොලක් නැරඹීමට බලාපොරොත්තු වූහ. මුහුදු මට්ටමිින් අඩි 1500ක උන්නතාංශයකින් පිහිටි මේ ගොවිපොල ගොඩනැඟිලි තිහකින් සමත්විතය. එළු කිරෙන් නිපදවනු ලබන නෝර්වීජියානු සුදු හා දුඹුරු චීස් එහි ප‍්‍රධාන නිෂ්පාදනයයි.

එහි ගිය අපේ පිරිසට ගොවිපොලේ නිපදවන විවිධ කිරි අහරින් සන්තර්පණය වීමට ඉඩ ලැබිණි. කෙසේ වෙනත් මා සම්බන්ධවූයේ බි‍්‍රක්ස්ඩාල් ග්ලැසියරය බලා යන අනෙක් කණ්ඩායම සමඟයි. පෝල්, නිලීකා හා ගොඞ්රිජ් මගේ ගමන් සගයෝ වුහ. අප නතරවූ තැන සිට මේ කඳුකර මාර්ගයෙහි දිගටම ඉහළට ඇදුනෙමු. ඉහළට නඟින්නට නඟින්නට ගෙයිරේන්ජර් ෆියෝඞ් වඩාත් මනරම්ව දිස්වන්නට විය.

අනතුරුව අපි ඩුප්වාන් විල පිහිටි දිශාවට හැරුනෙමු. කඳුකර දසුන්හි සුන්දරත්වය විඳිමින් අපි ඉදිරියට ඇදුනෙමු. අපේ ගමනාන්තයවූ ඩැල්ස්නිබා ශිඛරයට නැඟුනුවිට දිස්වන මනස්කාන්ත කඳුකර භූමි දර්ශනය අපට ඉහළට ගත් හුස්ම පහළට හෙලීමට අමතක කළේය. දුරින් දුරට ඇදී යන කඳු වළලූ, වැව්, දියඇලි සහ ජලාශවලින් සමත්විත මහේක්ෂ භූමි දර්ශනයෙන් වශීකෘත වෙමින් අපි ශිඛර මුඳුනෙහි ඉතා නැවුම් වාතය ලය පුරා ආශ්වාස කළෙමු.

අප පැමිණි රිය ඔල්ඩෙන්වට්නෙට් ජලාශය අසල පිහිටි බි‍්‍රක්ස්ඩාල් නේවාසිකාගාරය අසල නැවැත්වීය. එතැනට පෙනෙන්නේ හාත්පසින්ම මනරම්, උස් කඳුවැටි වලින් වටවූ දර්ශනයකි. මෙතැන් සිට අප ගමන් අරඹන්නේ නෝර්වේ අයිස් යුගයේ අවසාන නෂ්ටාවශිෂ්ඨය වන බි‍්‍රක්ස්ඩාල් ග්ලැසියරය වෙත යන ගමනයි. අපේ නවාතැන් පොලේ දී නෝර්වීජියානු දිවා අහරක් ගැනීමෙන් අනතුරුව අප පිටත්වන්නේ සුන්දර දියඇලි වේගයෙන් ගලාබස්නා ගංගා සහ කඳුකර ප‍්‍රපාතයන් පසුකරමින් මේ දැවන්ත හිම කූටය වෙත යෑමටයි.

මුලින්ම අප සේන්දුවූයේ හෝනින්ඩල්ස්වානෙට් විල වෙතය. මේ විල බටහිර නෝර්වේහි විශාලතම විල වන්නේය. එමෙන්ම යුරෝපයේ ගැඹුරුම විල වන්නේය. ස්කැන්ඩිනේවියානු කලාපයේ සුපිරිසිදුම දියත්න මේ ජලාශයයි. එදින සන්ද්‍යාවේ පහළ සනීල්ස් ෆියෝඞ්හි පිහිටි හෙලෙසිල්ට් ගම්මානයට අපි පැමිණියෙමු.