(ඩයනා උදයංගනී)

අලුත් අවුරුද්දේ හිසතෙල් ගැල්වීමේ නැකත අද (17) පෙරවරු 7.04ට යෙදී තිබිණි. මේ වෙනුවෙන් රට ‍පුරා වෙහෙර විහාරස්ථාන ඇතුළු ස්ථාන රැසකදී නැකතට හිසතෙල් ගැල්වීමේ චාරිත්‍රය ඉටුකෙරිණි.

හිසතෙල් ගැල්වීමේ රාජ්‍ය උත්සවය මහනුවර ශ්‍රී දළදා මාලිගා චතුරස්‍රයේ පිහිටි නාථ දේවාල පරිශ්‍රයේදී නැකැත් චාරිත්‍ර වලට මුල්තැන අද පෙරවරුවේ පැවැත්විණි.

වෙඬරුවේ උපාලි අස්ගිරි පාර්ශවයේ අනුනායක හිමියන් සහ දිඹුල්කුඹුරේ විමලධම්ම මල්වතු පාර්ශවයේ අනුනායක අහිමියන් ප්‍රමුඛ සංඝ රත්නයේ ප්‍රධානත්නවයෙන් එම උත්සවය පැවැත්විණි.

එහිදී සාම්ප්‍රදායික චාරිත්‍ර අනුව හස්තීන්ගේ හිසතෙල් ගැල්වීම සිදු කළ අතර එහිදී දළදා මාලිගයේ ඇත් පන්තියේ තායි රාජා හස්තියාගේ හිසතෙල් ගැල්වීමද සිදු කෙරිණි.

දේශීය වෙදකම් ප්‍රවර්ධන, ග්‍රාමීය හා ආයුර්වේද රෝහල් සංවර්ධන සහ ප්‍රජා සෞඛ්‍ය රාජ්‍ය අමාත්‍ය නීතිඥ සිසිර ජයකොඩි මැතිතුමන් සහ මධ්‍යම පලාත් ආණ්ඩුකාර ලලිත් යූ ගමගේ, රාජ්‍ය අමාත්‍යාංශයේ ලේකම් කුමාරි වීරසේකර, ආයුර්වේද කොමසාරිස් ධම්මික අබේගුණවර්ධන ඇතුලු රාජ්‍ය නිලධාරීන් පිරිසක් මෙම අවස්ථාවට සහභාගී වී සිටියහ.

කැලණිය රාජමහා විහාරස්ථානය, කොළඹ හුණුපිටිය ගංගාරාම විහාරය ආදී විහාරස්ථානවලදී ද හිසතෙල් ගැල්වීමේ චාරිත්‍රය උත්සවාකාරයෙන් සිදුකෙරිණි.

කොළඹ ගංගාරාමය (ඩික්සන් වසන්ත)

මහනුවර දළදා මලිගාව අසලදී 

අලුත්ගම කන්දේ විහාරය (තුසික කුමාර ද සිල්වා)

(ශාන්ත පී. බණ්ඩාර)

පින්නවල අලි සංරක්ෂණාගාරයේ අලි ඇතුන්ට හිස තෙල් ගෑම වනජීවී අමාත්‍යංශයේ ලේකම් සෝමරත්න විදානපතිරණ මහතාගේ ප්‍රධානත්වයෙන් ජාතික සත්වෝද්‍යාන දෙපාර්තමේන්තුවේ අධ්‍යක්ෂක ජනරාල් තිලක් ප්‍රේම කාන්ත මහතාගේ සහභාගීත්වයෙන් අද දින 7.04 යෙදුණ මොහොතින් සිදු කෙරිණි.

වෙනදා මෙන් මෙම අවස්ථාවට දේශපාලන අධිකාරියේ කිසිවකු සහභාගී නොවීම විශේෂ සිද්ධියක් විය.