ශ්‍රී පාද පෙරහැර පැල්මඩුල්ල ගල්පොත්තාවෙල විහාරස්ථානයෙන් ගමන් අරඹයි

(සම්පත් ප්‍රියනන්දන සහ උපේන්ද්‍ර ප්‍රියංකර ජාතුංගම)

මෙවර ශ්‍රී පාද වන්දනා වාරය ආරම්භ කිරීම සදහා පැල්මඩුල්ල ගල්පොත්තාවෙල රාජ මහා විහාරයේ තැන්පත් කර තිබුණ සාධාතුක කරඩුව සහ සමන් දේව ප්‍රතිමාව මාර්ග හතරක් ඔස්සේ පෙරහැර හතරකින් නල්ලතන්නිය දක්වා වැඩම කරවීම අද (28) අලුයම ආරම්භ කෙරිණි.

ශ්‍රී පාදානස්ථානාධිපති බෙංගමුවේ ධම්මදින්න හිමියන්ගේ අනුසානසා පරිදි සුභ නැකතකට අනුව එය ආරම්භ විය.

පැල්මඩුල්ල ගල්පොත්තාවෙල රාජ මහා විහාරස්ථානයේ සිට ශ්‍රී පාලාබද්දල මාර්ගය,හැටන් නල්ලතන්නිය මාර්ගය ,බලන්ගොඩ බගවන්තලාව මාර්ගය සහ රත්නපුර කුරුවිට මාර්ගය ඔස්සේ එම සාධාතුක කරඩුව සහ සමන් දේව ප්‍රතිමාව වැඩම කර විම ආරම්භ විය.

හෙට (29) වැනිදා උදුවප් පොහෝය දා එම දේවාභරණ ශ්‍රී පාද උඩ මලුවේ තැන්පත් කිරීමෙන් පසුව මෙවර ශ්‍රී පාද වන්දනා වාරය ආරම්භ කෙරේ.දේව ප්‍රතිමාව සහ සධාතුක කරඩුව වැඳ පුදා ගැනීම සහ පුෂ්පෝපහාර දැක්වීම සදහා බැතිමත්හු මාර්ග අසල රැඳී සිටිති.

ලබන වසරේ (2021)වෙසක් පොහෙය දිනයෙන් මෙවර ශ්‍රී පාද වන්දනා වාරය අවසන් කෙරේ

(ඡායාරූප -උපේන්ද්‍ර ප්‍රියංකර ජාතුංගම)