ශ්‍රී ලංකා නාවික හමුදාවේ 23 වැනි නාවික හමුදාපතිවරයා වශයෙන් පත්වීම් ලද වයිස් අද්මිරාල් පියල් ද සිල්වා මහතා අද (14) පොලිස් මූලස්ථානයේ දී පොලිස්පති පූජිත් ජයසුන්දර මහතා හමුවිය.

එහිදී පොලිස් විශේෂ සම්මාන උත්තමාචාරයක් මගින් නාවික හමුදාපති පොලිස් මූලස්ථානය වෙත පිළිගන්නා ලදී.

නාවික හමුදාපති ධූරයේ වැඩ බාර ගැනීමෙන් පසුව නාවික හමුදාපතිවරයා පොලිස්පති හමු වූ පළමු නිල හමුව බවට මෙය සනිටුහන් විය.

පොලිස්පතිවරයා විසින් නාවික හමුදාපති වෙත සුබ පැතුම් එක් කළ අතර, කාලීන වශයෙන් වැදගත් කරුණු කීපයක් පිළිබඳව සුහද පිළිසඳරක නිරත විය.

මෙම අවස්ථාව සංකේතවත් කරනු වස් සමරු තිළිණ හුවමාරුවක් ද සිදු කරන ලද අතර, එම අවස්ථාව සඳහා පොලිස් මුලස්ථානයට අනුයුක්ත ජ්‍යෙෂ්ඨ පොලිස් නිලධාරින් පිරිසක් ද සහභාගි වී සිටියහ.

(28535)

ඡායාරූප - නාවික හමුදා මාධ්‍ය අංශය