ශ්‍රී ලංකා නාවික හමුදාවේ මෙහෙයුම් කටයුතු පුළුල් කිරීම වෙනුවෙන් ඉන්දීය ගෝව නැව් තටාකාංගණයේ නිෂ්පාදනය කරන ලද ගැඹුරු මුහුදු නිරීක්ෂණ නෞකාව අද (28) කොළඹ වරායට සේන්දු විය. නාවික සම්ප්‍රදායානුකූල චාරිත්‍ර අනුව නාවික හමුදාව විසින් නෞකාව පිළිගන්නා ලදී.
 
නවීන යුද නෞකාවක් වන මෙය ශ්‍රී ලංකා නාවික හමුදා ඉතිහාසයේ ප්‍රථම වරට අලුතින්ම මිලදී ගත් ප්‍රථම අධි තාක්ෂණික නෞකාව ලෙස සනිටුහන් වනු ඇත.
 
නෞකාවේ මෙහෙයුම් සහ යාත්‍රා හැකියාව පරීක්ෂා කිරිමට එය මෙරට බලා යාත්‍රා කිරීමට ප්‍රථමයෙන් පරීක්ෂක ගමන්වාර සහ අත්හදා බැලීම් කිහිපයක් සිදු කර ඇත. 
 
නෞකාවේ නිෂ්පාදන කටයුතු සම්පූර්ණයෙන් අවසන් වන විට එහි පිරිවැය ඇමරිකානු ඩොලර් මිලියන 66.55 ක් වනු ඇත.
 
පසුගිය ජූලි 22 වැනි දා මෙම නෞකාව නිල වශයෙන් නාවික හමුදාවට භාර දීමේ උත්සවය, ඉන්දියාවේ ශ්‍රි ලංකා මහ කොමසාරිස්වරිය ලෙස කටයුතු කරන චිත්‍රාංගනී වාගිෂ්වර මහත්මියගේ ප්‍රධානත්වයෙන් ඉන්දියාවේ ගෝව නැව් තටාකාංගණයේදී සිදු කැරිණි.