(බිඟුන් මේනක ගමගේ )

යුද හමුදාවේ බල ඇණි 33 ක් වසාදැමීමට කටයුතු කර ඇති බවට අමාත්‍ය ෆීල්ඞ් මාෂල් සරත් ෆොන්සේකා මහතා කරන ප්‍රකාශයෙන් ආණ්ඩුව සහ දෙමළ ජාතික සන්ධානය අතර තිබූ රහස් ගිවිසුම ගැන හිටපු එජාප මහලේකම් තිස්ස අත්තනායක මහතා කළ හෙළිදරව්ව තහවුරු වන්නේ යැයි ගම්පහ දිස්ත්‍රික් පාර්ලිමේන්තු මන්ත්‍රී ප්‍රසන්න රණතුංග මහතා පවසයි.

ආවා වැනි කල්ලි උතුරේ බිහිවූයේ එල්.ටී.ටී.ඊ රැඳවියන් පූර්ණ පුනරුත්ථාපන ක්‍රියාවලියකට ලක් නොකොට නිදහස් කිරීමෙන් යැයි චෝදනා කළ හෙතෙම අද එම චෝදනා ආණ්ඩුව ඇතුලෙන්ම එල්ල වන විට නායකයන් නිහඬව සිටින්නේ යැයි ද පැවසීය.

බලය ලබාගැනීමේ අරමුණෙන් සුදු වෑන් කතා නිර්මාණය කළ පිරිස් අද ආණ්ඩු බලය ගෙන පාතාලයට රාජ්‍ය රැකවරණය දෙමින් සිටින්නේ යැයි ද එම නිසා පොලිසිය අසරණ වී සිටින්නේ යැයි ද මන්ත්‍රීවරයා කීවේය.

ගෝඨාභය රාජපක්ෂ මහතා පාතාලය මර්දනයට අත ගැසූ විට රටින් පලා ගිය පාතාලයන් නැවත කැඳවාගත්තේ මේ ආණ්ඩුවේ ප්‍රබලයන් යැයි ද අද එය ජනාධිපතිවරයා ඝාතනය කිරීමට කුමන්ත්‍රණය කරන තැන දක්වා ඔඩු දුවා ඇතැයි ද රණතුංග මහතා වැඩිදුරටත් සඳහන් කළේය.