(කාංචන කුමාර ආරියදාස) 
 
සෞදියේ ගෘහ සේවයට ගොස් තෙමහල් ගොඩනැගිල්ලකින් වැටී වසර තුනක කාලයක් එරට රෝහලක ප්‍රතිකාර ලබමින් සිටි සිය මව මියගොස් මාසයක පමණ කාලයක් ගත වී  ඇති බවත්   මවගේ  මෘත දේහය මෙරටට ගෙන්වා දෙන්නැයි  කැකිරාව කිතුල්හිටියාව ප්‍රදේශයේ පුතෙකු  මාධ්‍ය මගින් ඉල්ලීමක් කළේය.
 
ඒ අනුව විදේශසේවා නියුක්ති කාර්යාංශය ඇමැතිනි තලතා අතුකෝරල මහත්මියගේ මැදිහත්වීම මත අද (26) මියගිය ගෘහ සේවිකාවගේ මළසිරුර රජයේ වියදමින් නිවසට ගෙන්වා ඇත .
 
මියගිය ගෘහසේවිකාවගේ මළසිරුර බැලිමට නොහැකි තත්වයේ පැවතීම නිසා පෙට්ටිය සීල් තබා තිබූ  බව පුතා  එන් .කේ .ඒ . ගනුෂ්ක තෙරාජ්  කියයි .
 
තම මවගේ සිරුර හදුනා ගැනීමට නොහැකි තරමට විරූපී ව තිබුණු බවත් තම මව බවට හදුනා ගනු ලැබුවේ ඇයගේ පාදයේ නියපොත්තක් නොමැතිව තිබු මතකයෙන් බව ද ඔහු ප්‍රකාශ  කළේය.
 
කිතුල්හිටියාව උළුකැට වැව පාර කැකිරාව ලිපිනයේ පදිංචිව සිටි නෙල්කා දීපානි  කුමාරසිරි යන  තම මව 2011 වසරේ සෞදි අරාබියේ ගෘහ සේවිකාවක් ලෙස ගිය බවද . පසුව ඇය 2013 වසරේ මෙරටට නැවත පැමිණීමට සූදානම්ව සිටියදී සේවය කළ නිවසේ ඇයට වැටුප් ලබා නොදී එහි සිරකර ගෙන සේවය ලබාගත් බව සඳහන් කළේය.
 
පසුව 2014 වසරේ මාස ගණනාවක් යන තුරු සිය මව පිළිබඳ කිසිදු තොරතුරක් නොමැති වූ විට තමන් දැඩි වෙහෙසක් දරමින් මව සෙවීමේ කටයුතු සිදු කළ බවත්. පසුව විදේශ සේවා නියුක්ති කාර්යාංශය කළ පැමිණිල්ලක් අනුව මව මහල් තුනකින්  පහලට ඇද වැටී අසනීප තත්ත්වයේ එරට රෝහලක සිටින බව තොරතුරු හෙළිදරව් කරගැනීමට හැකියාව ලැබුණු බවද සඳහන් කළේය.
 
එසේ රෝගාතුරව සිටි තම මව පසුගිය නොවැම්බර් මාසයේ දහතුන් වන දින මියගිය බව විදේශ සේවා නියුක්ති කාර්යාංශයේ නිලධාරියකු දුරකථනයෙන් තමන් වෙත දැනුම් දුන් බවත් සඳහන් කළේය. 
 
සිය මව ගේ මෘත දේහය මෙරටට ගෙන්වාගැනීමට තමන් නැවත වරක් මාසයකට අධික කාලයක් වීදේශ සේවා නියුක්ති කාර්යාංශයට කළ ඉල්ලීම් සියල්ල අසාර්ථක වූ බව ද සඳහන් කළේය.