මේ මස 16 වැනිදා කොළඹ බණ්ඩාරනායක අනුස්මරණ සම්මන්ත‍්‍රණ ශාලාවේදී පැවැත්වෙන ශී‍්‍ර ලංකා කි‍්‍රකට් නිලවරණය මෙහෙයවීමට මැතිවරණ දෙපාර්තමේන්තුවේ නිලධාරීන් කැඳවා ඇතැයි ශී‍්‍ර ලංකා කි‍්‍රකට් සභාපති උපාලි ධර්මදාස මහතා පවසයි.

කි‍්‍රකට් නිලවරණයකදී මෙතෙක් කලක් පැවැති අත් ඔසවා ඡන්දය ප‍්‍රකාශ කිරීමේ ක‍්‍රමය වෙනුවට සංශෝධිත කී‍්‍රඩා පනත අනුව මෙම වසරේ සිට පැවැත්වෙන්නේ රහස් ඡන්දයකි.

මෙම තත්ත්වය අනුව රසාභ්‍ය භාවය රැකෙන පරිදි ඡන්ද පති‍්‍රකා මුද්‍රණය කිරීමේ වගකීමේ සිට ඡන්දය ගණන් කිරීමෙන් පසුව ප‍්‍රතිඵල නිවේදනය කිරීම දක්වා සියලූම කාර්යයන් මැතිවරණ දෙපාර්තමේන්තු නිලධාරීන්ට පැවරෙන බව ශී‍්‍ර ලංකා කි‍්‍රකට් සභාපතිවරයා පැවසීය.

”වෙනකක් තියා ඡන්ද පෙට්ටි ගේන්නෙත් ඒ අයමයි” යයිද ධර්මදාස මහතා වැඩිදුරටත් පැවසීය.

වර්ෂ 1923 දී ආරම්භ කරන ලද ‘ලංකා කි‍්‍රකට් සංගමය’ 1948 දී ‘ශී‍්‍ර ලංකා කි‍්‍රකට් පාලක මණ්ඩලය’ ලෙස වෙනස් කරන ලද අතර වසර 2001 දී එය ‘ශී‍්‍ර ලංකා කි‍්‍රකට්’ ලෙස යළි නම් කරන ලදි. එදා මෙදා තුර කාලයේදී ශී‍්‍ර ලංකා කි‍්‍රකට් ආයතනයේ නිලවරණයක් සඳහා මැතිවරණ දෙපාර්තමේන්තු නිලධාරීන් මැදිහත් වන්නේ පළමු වතාවටය.

වසර 1999 න් පසුව කී‍්‍රඩා අමාත්‍යවරයා විසින් වරින් වර පත්කරන ලද කි‍්‍රකට් අතුරු කමිටු කිහිපයක්ද තිබිණ.

කී‍්‍රඩා අමාත්‍යංශයේ අධ්‍යක්‍ෂිකා රංජනී ජයකොඩි මහත්මියගෙන් ‘ලංකාදීප’ ඊයේ (11 වැනිදා) කළ විමසීමකදී ඇය පවසා සිටියේ නිලවරණය පැවැත්වීමේ සම්පූර්ණ වගකීම සහ නිදහස ඇත්තේ ශී‍්‍ර ලංකා කි‍්‍රකට් ආයතනයට බවයි.

”නිලවරණය පැවැත්වෙන් ස්ථානය වෙනස් කරන්න අපෙන් අවසර ඉල්ලා හිටියා. අප ඒ අවසරය ඔවුන්ට දුන්නා” යයිද ජයකොඩි මහත්මිය වැඩිදුරටත් පැවසුවාය.

කෙසේ වෙතත් මීට පෙර සෑම අවස්ථාවකදීම සිදුවූ පරිදි ශී‍්‍ර ලංකා කි‍්‍රකට් නිලවරණය නිරීක්‍ෂණය කිරීමට කී‍්‍රඩා අමාත්‍යංශයේ නියෝජිතයකු (නියෝජ්‍ය අධ්‍යක්‍ෂක අයි. පී. විජේරත්න මහතා) යොමුකර ඇති බවද කී‍්‍රඩා අධ්‍යක්‍ෂවරිය ප‍්‍රකාශ කළාය.

80 දශකයේ සිට සෑම අවස්ථාවකදීම පාහේ කි‍්‍රකට් නිලවරණය පැවැතියේ ශී‍්‍ර ලංකා කි‍්‍රකට් මූලස්ථානයේදීය. එක් අවස්ථාවකදී එය කොළඹ ජාතික කී‍්‍රඩා විද්‍යායතනයේදීත් පැවැත්විණ.

එහෙත් මෙවර නිලවරණය බණ්ඩාරනායක සම්මන්ත‍්‍රණ ශාලාවට ගෙනයාමට හේතු විමසා සිටි කල්හි ශී‍්‍ර ලංකා කි‍්‍රකට් සභාපතිවරයා පවසා සිටියේ ඡන්දය ප‍්‍රකාශ කිරීම සඳහා පැමිණෙන 150 කට අධික කී‍්‍රඩා සමාජ නියෝජිතයන්, ශී‍්‍ර ලංකා කි‍්‍රකට් ආයතනයේ සේවකයන් සහ මැතිවරණ දෙපාර්තමේන්තුවේ නිලධාරීන් සියලූම දෙනා ඇතුළත් කිරීමට තරම් ශී‍්‍ර ලංකා කි‍්‍රකට් මූලස්ථානය ඉඩකට නොමැති බවයි.

”සංවිධාන කටයුතු වඩාත් පහසු කරගැනීම සඳහා අප එය බණ්ඩාරනායක සම්මන්ත‍්‍රණ ශාලාවට ගෙනයාමට තීරණය කළා” යයිද කි‍්‍රකට් ආයතනයේ වත්මන් සභාපති උපාලි ධර්මදාස මහතා පැවසීය.

ශී‍්‍ර ලංකා කි‍්‍රකට් ආයතනයේ මීලග සභාපතිවරයා ලෙස මේ වන විටත් නිතරගයෙන් පත්වී සිටින්නේ උපාලි ධර්මදාස මහතාගේ සොහොයුරු ජයන්ත ධර්මදාස මහතාය.