වෙළෙඳසේවා බැඞ්මින්ටන් සංගමය සංවිධානය කරන 29 වැනි ‘ලී නින්’ වෙළෙඳසේවා බැඞ්මින්ටන් තරගාවලිය මේ මස 24 වැනිදා සිට 28 වැනිදා දක්වා ගල්කිස්ස ශාන්ත තෝමස් විද්‍යාලයීය ගෘහස්ත ක‍්‍රීඩා සංකීර්ණයේදී පැවැත්වේ. මෙවර තරගාවලියට ආයතන සහ සමාගම් 49 කින් ක‍්‍රීඩක ක‍්‍රීඩිකාවෝ 275 ක වාර්තාගත පිරිසක් සහභාගිවෙති. ලන්ඩන් ඔලිම්පික් උළෙලේ බැඞ්මින්ටන් තරගාවලියේ පිරිමි කේවළ ඉසව්වේ අවසන් ක‍්‍රීඩකයන් 16 දෙනාගේ වටයට පිවිසෙමින් දස්කම් පෑ නිලූක කරුණාරත්න ද මෙම තරගාවලියට සහභාගිවෙයි. නිලූක, මැක්ලරන්ස් සමුහ ව්‍යාපාරය නියෝජනය කරමින් තරග වදියි. තරගාවලියට ඞී. සැම්සන් පුත‍්‍රයෝ සමාගම (ඞී.එස්.අයි.) බෙදාහරින ‘ලී නින්’ බැඞ්මින්ටන් ක‍්‍රීඩා නිෂ්පාදන අනුග‍්‍රහය දක්වයි. සිංගප්පුරුවේ සන්ලයිට් ස්පෝර්ට්ස් සමාගමේ ශ්‍රී ලංකා, මාලදිවයින සහ මැදපෙරදිග රටවල ප‍්‍රධානී ප‍්‍රදීප් සිං මහතා විසින් ශී‍්‍ර ලංකා වෙළෙඳසේවා බැඞ්මින්ටන් සංගමයේ සභාපති නිරෝධ ඞී.කොස්තා මහතාට අනුග‍්‍රහකත්වය පිරිනමන ලද අවස්ථාව. ඞී. සැම්සන් පුත‍්‍රයෝ සමාගමේ කළමනාකාර අධ්‍යක්‍ෂ ලාල් නුගලියද්ද, එම සමාගමේ වෙළෙඳ සහ ප‍්‍රවර්ධන සාමාන්‍යාධිකාරී රොහාන් සෝමවංශ සහ වෙළෙඳ ලාංඡන විධායක දේවින්ද කුලතුංග යන මහත්වරුද ඡායාරූපයේ සිටිති.