සුජිත් හේවාජුලිගේ

ජනතා විමුක්ති පෙරමුණ පාර්ලිමේන්තුවට ඉදිරිපත් කළ විසිවැනි ආණ්ඩුක්‍රම ව්‍යවස්ථා සංශෝධය පාර්ලිමේන්තුවේ න්‍යාය පත්‍රයටවත් ඇතුළත්වීමේ හැකියාවක් නැතැයි පත් කළ පාර්ලිමේන්තු මන්ත්‍රී අතුරලියේ රතන හිමියෝ ‘‘ලංකාදීප‘‘ යට අද (14) පැවැසීය.

‘‘ප්‍රායෝගිකව ඒක වෙන්න බැරි දෙයක්‘‘ යැයිද උන්වහන්සේ පැවැසූහ.

අතුරලියේ රතන හිමයෝ මෙසේද පැවැසූහ.

    ‘‘ජනාධිපතිවරයා විසිවැනි සංශෝධනයක් ගේන්න, විධායක ජනාධිපති ක්‍රමය අහෝසි කරන්න රටේ ජනමතයක් ඇති කළේ නැහැ.ඒ වගේම විධායකයේ නරක ලක්ෂණ ඉවත් කරනවා විනා මුළු විධායකය ඉවත් කරනවා කියලා එතුමා කිව්වේ නැහැ.

විධායකය සම්පුර්ණයෙන්ම ඉවත් කළාම රටේ ඒකීයභාවයට තියෙන බලපෑම එතුමා තේරුම් ගන්න ජනමත විචාරණයකට තුඩු දෙන ව්‍යවස්ථා සංශෝධනයක් කරනවා කියලා ජනාධිපතිතුමා කිව්වේ නැහැ.ව්‍යවස්ථාවෙන් පෙරලියක් කරන්න පුළුවන් කියලා හිතෙන්නේ රාජ්‍ය නොවන සංවිධානවල කල්ලියක්.

විධායකය සංශෝධනය කරන්නේ නැහැ කියලා ජනාධිපතිතුමා අපට ලියලම දීලා තියෙනවා.

ජෙවීපී එකයි රනිල් වික්‍රමසිංහ මහත්තයයි අද හිතන විදිහ සමානයි.ජාතික සංස්කෘතිය පිළිබඳ ඒ දෙගොල්ලෝම අද ඉන්නේ ලිබරල් මතයක.ඒ නිසා දෙගොල්ලෝ මේ වෙලාවේ එකට ගැළපෙනවා.

අද ජේවීපී එක ඉටු කරන්නේ රනිල් වික්‍රමසිංහ මහත්තයාගේ අභිලාෂයක්‘‘ කියලා මට හිතෙනවා.