විනිසුරුවරුන් ලෙස උසාවි පුටුවේ සිට රජකම් කරනවාට වඩා මහජන සේවකයකු ලෙස ක්‍රියා කිරීම සුදුසුයැයි මොහාන් පීරිස් අග විනිසුරු මනම්පිටිය නව මහේස්ත්‍රාත් උසාවිය විවෘත කරමින් ප්‍රකාශ කළේය.

ඔහු මෙසේ ද කීවේය.

‘විනිසුරුවරුන් හා නීතිවේදීන් හැටියට අප මහජනතාවට ආදර්ශයක් විය යුතුයි. මහජනතාව අප කෙරෙහි විශාල උත්තරීතර විශ්වාසයක් තබා ගෙනයි උසාවියට එන්නේ. මේ සේවය ඉතා වටිනා සේවයක්. අපි අපේ ජීවිත වලින් පවා හැඩ ගැසිය යුතුයි. අපේ වෘත්තිය මහජනතාව වෙනුවෙන් සංවේදීව කටයුතු කළ යුතුයි. මම ඒ දේ පිළිගන්නවා. ඒ පණිවිඩය පිළිපදින ලෙස සෙසු විනිසුරුවරුන්ටත්   කියනවා.

මහජනතාවට මම කියන්නේ සුළු දෙයකට පවා උසාවියට දුවගෙන එන්න එපා. මේ නීති රීති අපිට පමණක් ඇති දායාදයක් නෙමෙයි. ඒ නීතියට ජනතාව ගරු කළ යුතුයි. ජනතාව ඊට පණ දිය යුතුයි. සහජීවනය නොමැතිවුවහොත් නීතිද ඇද වැටෙනවා. උසාවියක් විවෘත කරන්නේ නඩු වැඩිකරගන්න නෙමෙයි. අද පාසලක  ළමයකුගේ කනෙන් මිරිකුවත් අධිකරණයට යනවා. සුළු දේවල් කෙස් පැලෙන තර්ක ඉදිරිපත් කර  ජනතාවට මහා ලොකු දෙයක් ලෙස පෙන්වන්න එපා. සංචාරක උසාවි තිබුණ පළියට නඩු ගෙන්න එපා. අද නීති පද්ධතිය එදා තිබුණු තත්ත්වයට ගේන්න කටයුතු කළ යුතුයි. ඒ සඳහා සියලු දෙනාම එකතු වෙලා නීති පද්ධතිය පෝෂණය කිරීමට හැකියාව ලැබේවා කියා ප්‍රාර්ථනා කරනවා.‘