(විමුක්ති එස් රුද්‍රිගු)

ශ්‍රී ලංකාවේ ශීඝ්‍රයෙන් ඉහළ යන උද්ධමනය හමුවේ ශ්‍රී ලාංකික ජනතාවට තුන්වේල ආහාර ලබා ගැනීම ගැටලුවක් වී ඇතැයි රොයිටර් පුවත් සේවය ප්‍රකාශ කළේය.

ඉන්ධන හිඟය හේතුවෙන් බොහෝ පිරිසකගේ ජීවනෝපායද අවදානමට ලක්ව ඇතැයි රොයිටර් පුවත් සේවය පවසයි.

ආහාර මිල ඉහළ යාම හේතුවෙන් පවුලක සාමාජිකයින්  ආහාර ගන්නා වේල් ප්‍රමාණය අඩු කිරීමට සිදුව ඇතැයි රොයිටර් පුවත් සේවය පෙන්වා දෙයි.ශ්‍රී ලංකාවේ ජුනි මස උද්ධමනය සියයට 54.6 ක් බවත් ප්‍රවාහන ගාස්තු සියයට 128 කින් වැඩි වී ඇති බවත් ආහාර උද්ධමනය සියයට 80.1 බවත් නිල දත්ත වාර්තා උපුටා දක්වමින් රොයිටර් පුවත් සේවය සඳහන් කළේය.

ලෝක සෞඛ්‍ය සංවිධානය නිර්දේශ කරන පෝෂ්‍යදායි ආහාර වේලක් ගැනීමට ශ්‍රී ලාංකික පවුලක් මසකට රුපියල් 93,675 සිට 148,868 මුදලක් ඉපැයිය යුතු  බව ආහාර උද්ධමනය ගණනය කිරීමේ විශේෂඥයෙකු වන ආර්ථික විද්‍යාඥ රෙහානා තව්ෆීක් මහත්මිය රොයිටර් පුවත් සේවයට ප්‍රකාශ කර ඇත.

නමුත් ශ්‍රී ලංකික පවුලක සාමාන්‍ය ආදායම මසකට රුපියල් 76,414 බවත් ශ්‍රී ලංකා ජනගහණයෙන් සියයට 20 ක් වන දුප්පත් පවුලක මාසික ආදායම රුපියල් 17,572 ක් බවත් නිල දත්ත වාර්තා උපුටා දක්වමින් රොයිටර් පුවත් සේවය සඳහන් කළේය.

ශ්‍රී ලංකාවේ වත්මන් අර්බුදය හේතුවෙන් ජනතාව විඳින දුෂ්කරතා තවත් උග්‍ර කරමින් එළවළු මිල දෙගුණ වී ඇති බවත් ගිය වසරේ රුපියල් 145 ක් වූ සහල් කිලෝවක මිල අද වන විට රුපියල් 230 ක් වී ඇති බවත්  රොයිටර් පුවත් සේවය පැවසුවේය.