ජපානයේ චිබා නුවරදී මේ මස 25 වැනිදා ආරම්භවන ලෝක ශූරතා කනිෂ්ඨ බැඞ්මින්ටන් තරගාවලියට සහභාගිවන ශ්‍රී ලංකා පිල හෙට (22) ජපානය බලා පිටත්ව යයි. තරගාවලිය නොවැම්බර් මස 4 වැනිදා දක්වා පැවැත්වීමට නියමිතය. තරගාවලියට ශ්‍රී ලංකාවෙන් වයස 17 න් පහළ පිල (බාලක/බාලිකා) කණ්ඩායම සහභාගිවේ.  ක‍්‍රීඩකයන් අට දෙනෙක් සහ ක‍්‍රීඩිකාවෝ අට දෙනෙක් ශ්‍රී ලංකා පිලට ඇතුළත්වෙති. කණ්ඩායම් සහ විවෘත ඉසව් දෙකෙන්ම පැවැත්වෙන මෙම තරගාවලියේ මුලික වටයේදී චීනය සහ එංගලන්තය සමග ශ්‍රී ලංකාව තරග වදියි. රටවල් 30 කින් ක‍්‍රීඩක ක‍්‍රීඩිකාවෝ තරගාවලියට සහභාගිවෙති. සංචාරක ශ්‍රී ලංකා කනිෂ්ඨ බැඞ්මින්ටන් පිල: බාලක කණ්ඩායම: බුවනෙක ගුණතිලක, විභවි මධුෂ, පමෝද හෙට්ටිආරච්චි, සෙනුර හපුආරච්චි, රවිඳු කිෂාන්, හරිඳු ධනුද්දර, ඉමේෂ් හසරංග ද සිල්වා, සචින් ඩයස් බාලිකා කණ්ඩායම: තිළිණි ප‍්‍රමෝදිකා හෙන්දහේව, සුෂ්මිතා ඉලංගකෝන්, ළිහිණි රුවන්තිකා, පුණීෂා පැස්කුවල්, මනීෂා ප‍්‍රසාන්දි, යෂ්මිතා දයාරත්න, කාවින්දිකා බිනරි, මධුෂිකා දිල්රුක්‍ෂි ජයමිණී ඉලේපෙරුම (කණ්ඩායම් ප‍්‍රධානී), රේණුකා විමලසුරිය (කළමනාකාරිණී), මසාමි යමසාකි (පුහුණුකාරිණී) සහ චමීර කුමාරප්පෙරුම (සහය පුහුණුකරු) යන මහත්ම මහත්මීහු.