(ඉන්දිකා රාමනායක)

මැණික් ව්‍යාපාරිකයන් ඇතුළු විවිධ පුද්ගලයන් රවටා රුපියල් කෝටි දෙසීයකට අධික මුදලක් වංචා කර, සංචාරක වීසා මගින් මාලදිවයිනට පලා ගොස් සැඟවී සිටි ශ්‍රී ලාංකිකයකු අපරාධ පරීක්ෂණ දෙපාර්තමේන්තුවේ විශේෂ පොලිස්‌ කණ්ඩායමක් මාලදිවයිනට ගොස් අත්අඩංගුවට ගත් බව අපරාධ පරීක්ෂණ දෙපාර්තමේන්තු ආරංචිමාර්ග පවසයි.

අපරාධ පරීක්ෂණ දෙපාර්තමේන්තුව සැකකරුට එරෙහිව රතු නිවේදන නිකුත් කර ඇති අතර, ඒ අනුව, මාලදිවයින් රාජ්‍යය ඔහු පිටුවහල් කිරීමෙන් අනතුරුව, එරටදී අත්අඩංගුවට ගත් බව අපරාධ පරීක්ෂණ දෙපාර්තමේන්තුවේ උසස් නිලධාරියෙක් පැවැසීය.

ඔහු සතුව වටිනා මැණික් ඇති බවට පවසමින්, ඒවා ආයෝජනය කිරීම සඳහා දෙන බවට පවසමින් මැණික් ව්‍යාපාරිකයන්ගෙන් රුපියල් කෝටි ගණනින් මුදල් වංචා කිරීමට සම්බන්ධ පැමිණිලි රැසක් සැකකරුට එරෙහිව කොළඹ අපරාධ කොට්ඨාසයට සහ අපරාධ පරීක්ෂණ දෙපාර්තමේන්තුවට ලැබී ඇති බවත්, එම පැමිණිලි විමර්ශන කර සැකකරු අත්අඩංගුවට ගැනීමට සූදානම් වෙද්දී රටින් පැන ගියේය.