අන්තවාදී අදහස් ඇති කණ්ඩායම්වලට රාජ්‍ය ආරක්ෂක යාන්ත්‍රණයේ තීරකයින් ලෙස කටයුතු කිරීමට පහසුවන මාර්ග සැකසීම ජාතික ආරක්ෂාවටත් නීතියේ ආධිපත්‍යයටත් තර්ජනයකැයි, නාහිමිවරුන් ඇතුළු නාහිමිවරු 12 නමක් ජනාධිපති ගෝඨාභය රාජපක්ෂ මහතා වෙත ලිපියක් යවමින් කියා සිටිති.

අධිකරණ අමාත්‍ය ජනාධිපති නීතිඥ මොහොමඩ් අලි සබ්රි මහතා විසින් ජනපතිවරයාගෙන් කළ ඉල්ලීමක් අනුව, පොලිස් දෙපාර්තමේන්තුවේ පොලිස් පරීක්ෂකවරුන්  ලෙස නීතීඥයින් 150දෙනෙකු බඳවාගැනීමටත්, ඔවුන් දෙමළ භාෂාව පිළිබඳ විශේෂ දැනුමක් ලබාතිබීම විශේෂ සුදුසුකමක් ලෙස සලකා බැලීමටත් ගත් තීරණයක් සම්බන්ධයෙන් මෙම ලිපිය යොමුකර තිබේ.

එම තීරණය ව්‍යවස්ථා විරෝධී සහ ජනතා ද්‍රෝහී තීරණයක් බව විස්තර කරමින්, එය ක්‍රියාත්මක නොකරන ලෙස ජනාධිපති ගෝඨාභය රාජපක්ෂ මහතාගෙන් ඉල්ලා සිටීම මෙම ලිපියෙහි අරමුණය.

මෙම ලිපියට ඇල්ලේ ගුණවංශ, බෙංගමුවේ නාලක, මුරුත්තෙට්ටුවේ ආනන්ද, ඕමාරේ කස්සප, අතපත්තුකන්දේ ආනන්ද ඇතුළු හිමිවරුන් අත්සන් තබා ඇත.