සීගීරිය නැරඹීට ගිය මස්කෙළි සිසුන් පිරිසක් සිංහ පාදයේ අකුරු ලියා වනසා ඇතැයි පුරා විද්‍යා නිලධරයෝ කියති.

සිකුරාදා සවස පහට පමණ මේ සිද්ධිය සිදුවිය. එම අවස්ථාවේ සීගිරි සිංහ පාදය අසල ආරක්ෂාවට කිසිදු ආරක්ෂකයෙක් යොදවා සිට නැත.

සීගිරිය නරඹා සීගිරි භූමියෙන් පිටව යමින් සිටි එම පාසල් සිසුන්ගෙන් තිදෙනෙක් සීගිරි ආරක්ෂකයන් විසින් අල්ලා ගත්හ. පසුව එම ස්ථානයට පොලීසිය කැඳැවීය.

සීගිරි සිංහ පාදයේ අකුරු ලියා ඇති අයුරු සහ පොලීසිය පැමිණ විමර්ශන සිදු කරන අයුතු ඡායාරූප ගත කළ ‘ලංකාදීප‘ සහ ‘අද‘ පුවත්පත්හි මාධ්‍යවේදීනට එම සිසුන් සමග පැමිණි ගුරුවරුන්ගෙන් හා පොලීසියෙන් බාධා සිදුවිය.

තමන් මාධ්‍යවේදීන්යැයි හැඳුණුම්පත් පෙන්වද්දී පවා එම ඡායාරූප මකා දමන ලෙසට ඔවුහු බල පෑම් කළත් ඒවා මකා දැමීමට නොහැකි විය.

පස්වරු 7.30ට පමණ උප පොලිස් පරීක්ෂකවරයකුගෙන් සමන්විත පොලිස් කණ්ඩායමක් විසින් සිසුහු පොලිස් ජීප් රියට නංවාගෙන පොලීසියට රැගෙන ගියහ.

සීගිරිය නැරඹීමට පැමිණි අයකු පැවසුවේ පුරා විද්‍යා වටිනාකමක් ඇති ස්ථානයකට සිසුන් රැගෙන යද්දී ඒවායේ වටිනාකම සහ එවැනි ස්ථානවල හැසිරිය යතු අන්දම කියා දිය යුතු බවයි.

දැනගන්නට ඇති පරිදි කලක පටන් සීගිරි සිංහපාදය අසළ රාජකාරි සඳහා ආරක්ෂකයෙක් යොදවා තිබී නැත.

(ග.හෙ)