(සුජිත් හේවාජුලිගේ )

ලියාපදිංචිව සිටින සියලුම භික්‍ෂූන් වහන්සේලා හතළිස් දහසට විධිමත් නිල හැඳුනුම්පතක් වහාම නිකුත් කරන ලෙස තමා රජයෙන් විශේෂ ඉල්ලීමක් කරන බව සමගි ජන බලවේගයේ මහනුවර දිස්ත්‍රික් මන්ත්‍රීනී නීතිඥ චමින්ද්‍රානී කිරිඇල්ල මහත්මිය පැවසුවාය.

තමා පසුගිය දිනෙක මල්වතු මහ නාහිමි පාණන් වහන්සේ බැහැදුටු අවස්ථාවේදී උන්වහන්සේ මෙම කාරණය පාර්ලිමේන්තුවට දැනුම් දෙන ලෙස පැවසුවේ යැයිද ඇය සඳහන් කළාය.

අද පවතින ප්‍රශ්න බොහොමයක් භික්ෂූන් වහන්සේලාට නිල හැඳුනුම්පතක් නිකුත් කිරීමෙන් විසඳෙනු ඇතැයි තමා විශ්වාස කරන බවද මන්ත්‍රීවරිය පැවසුවාය.

බුද්ධ ශාසනයට සහ මහා සංඝරත්නයට බොහෝ අභියෝග මෙන්ම තර්ජන එල්ල වුණු කාලපරිච්ඡේදයක් අද උද්ගතව ඇති බව පැවසූ චමින්ද්‍රාණී කිරිඇල්ල මහත්මිය මේ තත්වය සමනය කිරීමට සියලු පාර්ශ්ව සද්භාවයෙන් මැදිහත් විය යුතු බවද සඳහන් කළාය.

බුද්ධ ශාසනය මෙපමණ කාලයක් අඛණ්ඩව පැවත ආවේ ගෞරවනීය භික්ෂූන් වහන්සේලාගේ කැපවීම සහ මග පෙන්වීම මත පදනම්ව බව සියලු දෙනා සිහි තබාගත යුතු යැයිද ඇය පැවසුවාය.

ගෞරවනීය භික්ෂූන් වහන්සේලාට නිල හැඳුනුම්පතක් නිකුත් කිරීම කාලෝචිත යුග අවශ්‍යතාවක් බව කිරිඇල්ල මහත්මිය වැඩිදුරටත් සඳහන් කළාය.