(ෂේන් සෙනෙවිරත්න සහ චමිල් රූපසිංහ)

මල්වතු මහා නාහිමියන් සම්බන්ධ කර ගනිමින් සාවද්‍ය පුවත් නිර්මාණය කරනමින් මහජන කැළඹීම් ඇති කිරීමට උත්සාහ කරන පුද්ගලයන් සහ සංවිධානවලට එරෙහිව ඉදිරියේදී අවශ්‍ය නෛතික ක්‍රියාමාර්ග ගන්නා බව මල්වතු මහා විහාර පාර්ශ්වයේ උප ලේඛකාධිකාරී මහවෙල රතනපාල හිමියන් නිවේදනයක් නිකුත් කරමින් පවසති.

හිටපු ජනාධිපති මහින්ද රාජපක්ෂ මහතා මල්වතු මහා නාහිමියන් බැහැ දැක ශිරන්ති රාජපක්ෂ මහත්මිය අත්අඩංගුවට ගැනීමේ රජයේ උත්සාහයක් තිබෙන අතර එය වළකා දෙන ලෙස මල්වතු මහා නාහිමියන්ගෙන් ඉල්ලීමක් කර ඇති බවත් එය මල්වතු මහා නාහිමියන් ප්‍රතික්ෂේප කර ඇති බවත් සමාජ මාධ්‍යයේ පැතිර යන සාවද්‍ය පුවතක් සම්බන්ධයෙන් මල්වතු මහා විහාර පාර්ශ්වයේ උපලේඛකාධිකාරී හිමියන් මල්වතු මහානායක හිමියන්ගේ උපදෙස් පරිදි එම ලිපිය නිකුත් කර තිබේ.

හිටපු ජනාධිපති ආර්යා ශිරන්ති රාජපක්ෂ මහත්මිය අත්අඩංගුවට ගැනීමට රජයේ සූදානමක් ඇති බවත් එය වැළැක්වීමට වත්මන් ජනාධිපතිතුමන් වෙත බලපෑම් කරන ලෙස මල්වතු මහා විහාර පාර්ශවයේ මහානායක හිමිපාණන් වහන්සේගෙන් හිටපු ජනාධිපති මහින්ද රාජපක්ෂ මහතා ඉල්ලීමක් කරන ලද බවට සමාජ මාධ්‍යයේ ප්‍රචාරය වන පුවත සාවද්‍ය හා පදනම් විරහිත පුවතක් බව මල්වතු පාර්ශවයේ මහානායක හිමියන්ගේ උපදෙස් පරිදි හා නියමය මත දැනුම් දෙන බව එහි සඳහන්ය.