(ක්‍රිෂාන් ජීවක ජයරුක්)
 
වැලිගම මිරිස්ස මුහුදු වෙරල තීරයේ සියලුම අනවසර ඉදිකිරීම් කඩා ඉවත් කරන ලෙසට ජනාධිපති මෛත්‍රිපාල සිරිසේන මහතා වෙරල සංරක්ෂණ හා වෙරල සම්පත් කළමනාකරණ දෙපාර්තමේන්තුව වෙත නියෝග කර ඇත.
 
ඒ අනුව අනවසර ඉදිකිරීම් ලෙස දැනට හඳුනා ගෙන ඇති හෝටල් 18 ක් පොලිස් ආරක්ෂාව යටතේ කඩා ඉවත් කිරිමේ කටයුතු අනිද්දා (11) දින සිදු කිරීමට සැලසුම් කර තිබේ.
 
ඒ සඳහා පොලීසියේ නිලධාරීන් සිය දෙනෙකු විශේෂ රාජකාරී යටතේ වැලිගම මිරිස්ස වෙරල තීරයට කැඳවා තිබෙන අතර පොලිස් විශේෂ කාර්ය බලකාය ද කැඳවා ගැනීමට නියමිත බව උසස් පොලිස් නිලධාරියෙක් පැවසීය.
 
ඊට අමතරව ජල හා කඳුළු ගෑස් සහිතව කැරලි මර්දන කණ්ඩායම් කිහිපයක් ද සීරුවෙන් තබා ඇත.
 
අදාල හෝටල් හිමියන් හා ප්‍රාදේශීය දේශපාලඥයින්ගෙන් එල්ල විය හැකි විරෝධතා පාලනය කිරීම සඳහා අධිකරණ නියෝගයක් ද ලබා ගැනීමට කටයුතු කරන බව පොලීසිය කියයි.