(රෝෂන් තුෂාර)

මොරටුව මහ නගර සභාවේ මාර්ග සංවර්ධන ව්‍යාපෘති 112ක් කිසිදු ටෙන්ඩර් කැඳවීමකින් තොරව ,නගර සභා ආඥා පනතේ රෙගුලාසි හා රාජ්‍ය මුදල් චක්‍රලේඛ උල්ලංඝනය කරමින් කොන්ත්‍රාත්කරුවන්ට ලබා දී රජයට හා ප්‍රජා සමීතිවලට පාඩුවක් කරමින් තමන්ට වාසියක් සලසා ගත්තේ යැයි බන්ධනාගාර ගතව සිටි මොරටුව හිටපු නගරාධිපති සමන් ලාල් ප්‍රනාන්දු මහතා   දැඩි කොන්දේසි යටතේ ඇප මත මුදා හැරීමට   කොළඹ ප්‍රධාන මහේස්ත්‍රාත් අසංක ඒස් බෝදරගම මහතා අද(23) නියෝග කළේය.

සැකකරුට මොරටුව මහ නගර සභාවට ඇතුල්වීම තහනම් කළ මහේස්ත්‍රාත්වරයා රුපියල් පනස් දහසක මුදල් ඇපයක් සහ ලක්ෂ දහය බැගින් වූ ශරීර ඇප තුනක් නියම කළේය.

විදෙස් ගමන් තහනම් කළ මහේස්ත්‍රාත්වරයා විදෙස් ගමන් බලපත්‍රය අධිකරණය තැන්පත් කරන ලෙසට නියෝග කළ අතර සාක්ෂිකරුවන්ට බලපෑම් කළහොත් ඇප අවලංගු කර නඩුව විභාග කර අවසාන වන තෙක් රක්ෂිත බන්ධනාගාර ගත කරන බවටද නියෝග කළේය.

"මග නැගුම"  ග්‍රාමීය මාර්ග සංවර්ධන වැඩසටහනට අදාළව රුපියල් මිලියන සීයයකට අධික වටිනාකමින් යුත් මාර්ග සංවර්ධන ව්‍යාපෘති   112 ක් මොරටුවේ  ප්‍රජා සමීති 12ක් වෙත ලබා දෙන බවට අඟවා එම ව්‍යාපෘති කොන්ත්‍රාත්කරුවන්ට ලබා දී   අයුතු ලාබ ලබා ගනිමින් රජයට පාඩු කිරීම සම්බන්ධයෙන් මෙම විමර්ශනය අල්ලස් කොමිසම මගින් සිදු කෙරේ.