( ඉන්දිකා රාමනායක)
 
පෞද්ගලික බැංකු සේවිකාවක් වශයෙන් පෙනී සිටිමින් එම බැංකුවේ ස්ථාවර  තැන්පතුවලට වැඩි මුදලක් ලබා දෙන බව පවසා රුපියල් කෝටි 2 1/2 ට අධික මුදලක් වංචා කළ කාන්තාවක් අත්අඩංගුවට ගැනීමට කොළඹ වංචා විමර්ශන කාර්යාංශය  මහජන  සහය පතයි.

පිළියන්දල , මඩපාත, අලූබෝගහවත්තේ  අංක ,66 නිවසේ පදිංචි ප‍්‍රත‍්‍රමතන්ත‍්‍රිගේ දෝන නිශාදි ධනුෂ්කා නැමැති ජාතික හැදුනුම්පත (827253464) දරණ සැකකාරි මෙලෙස අත්අඩංගුවට ගැනීමට මහජන සහය පතන බව පොලිස් මාධ්‍ය ප‍්‍රකාශක පොලිස් අධිකාරි රුවන් ගුණසේකර මහතා පැවසීය.

මෙම සැකකාරිය ඉහත ලිපිනයේ පදිංචිව සිටියදී 2017,2018 යන වසර වල බැංකුවේ ස්ථාවර තැන්පතු වලට වැඩිම පොලියක් ලබාදෙන බව පවසමින්  කාන්තාවන් ඇතුලූ පුද්ගලයින්  පස් දෙනකුගේ මුදල් ලබාගෙන ඒ වෙනුවෙන් ඔවුන් ව්‍යාජ තැන්පතු සහතික නිකුත් කර ඇති බව  වංචා විමර්ශන  කාර්යාංශයේ උසස් නිලධාරියෙක් පැවසීය.

රුපියල් ලක්ෂ 10, 25, 40, 45, 50, වශයෙන් පුද්ගලයන්ගෙන් මුදල් ලබාගෙන සැකකාරිය මෙම ව්‍යාජ   තැන්පතු නිකුත්කර ඇති බවත් ඒ සම්බන්ධයෙන් වංචා විමර්ශන අංශයේ ඒකකය 3 සහ 7 වෙත පැමිණිලි රැසක් ලැබී ඇති බව  එම නිලධාරියා කීය.

ඒකක 3 බාර ස්ථානාධිපති ප‍්‍රධාන පොලිස් පරීක්ෂක පිලපිටිය සහ ඒකක 7 බාර ස්ථානාධිපති ප‍්‍රධාන පොලිස් පරීක්ෂක බස්නායක යන මහත්වරුන් විසින් මෙම පරීක්ෂණ ආරම්භ කර ඇත.

ව්‍යාජ ලේඛන ඉදිරිපත් කර මුදල් වංචා කර සාපරාධී සාවද්‍ය පරිහරණය කිරිම සම්බන්ධයෙන් මෙම සැකකාරියට එරෙහිව කොළඹ කොටුව,අලූත්කඩේ,මාලිගාකන්ද,මොරටුව යන මහේස්ත‍්‍රාත් අධිකරණවල නඩු රැසක් විභාග වන බවද වංචා විමර්ශන අංශය සඳහන් කරයි.

පහත  ඡායාරූපයෙන්  සිටින මෙම සැකකාරි සම්බන්ධයෙන් තොරතුරක් වෙතොත්  කොළඹ වංචා විමර්ශන කාර්යාංශයේ අධ්‍යක්ෂ-0112673593,ස්ථානාධිපති කොළඹ වංචා විමර්ශන කාර්යාංශ - 0112673571,කොළඹ වංචා විමර්ශන අංශය - 0112673590, අංක වෙත දැනුම් දෙන ලෙසට පොලිසිය ඉල්ලා සිටියි.

ඡායාරූප සැපයුම - පොලිස් මාධ්‍ය ප්‍රකාශක කාර්යාලය